ابن عم طالب الدقهلية في التحقيقات: سألت مدرس الفيزياء على إيهاب ضحك وقالي خرج
كشفت التحقيقات في قضية مقتل الطالب إيهاب أشرف بالدقهلية على يد مدرس الفيزياء، وتقطيع جثته إلى 3 أجزاء، تفاصيل جديدة في الواقعة، وأن المتهم اشترى أدواته قبل ارتكاب جريمته بنحو أسبوع.
تحقيقات طالب الدقهلية
واستمعت جهات التحقيق لأقوال ابن عم المجني عليه إيهاب أشرف طالب الدقهلية وجاءت كالتالي: اللي حصل وأعرفه إن يوم الثلاثاء 13-2-2024 عرفت من جدتي أن إيهاب ابن عمي خرج من الدرس من عند الأستاذ محمد عبد البديع وما رجعش على البيت ومحدش عارف هو فين فأنا خرجت أنا وأخويا عبد الله وروحنا الأوضة اللي الأستاذ محمد عبد البديع بيدي فيها الدروس بتاعته علشان إحنا عارفين أن إيهاب كان عنده درس عند الأستاذ محمد يوم الثلاثاء وأول لما وصلنا قابلنا الأستاذ محمد عبد البديع قدام باب الأوضه اللي بيدي فيها الدرس وكان بيقفل باب الأوضه اللي بيدي فيها دروس وأنا سألته على إيهاب لاقيته ضحك في وشي وقالي إن هو خرج من الدرس من عنده بقاله حوالي ساعة ونصف تقريبًا.
وأضاف: بعد كده أخدت أخويا عبد الله وروحت على بيت عمي أشرف وقعدنا كلنا هناك ولما قعدنا في بيت عمي كنا كل شوية نتصل على تليفون إيهاب ومرة واحدة وخالتي حنان كانت قاعدة معانا وبتتصل على تليفون إيهاب لاقينا فيه حد رد على التليفون وقالها إحنا خرجنا إيهاب بره المحافظة وجهزوا مبلغ مائة ألف جنيه علشان إيهاب يرجع وهيتبعتوا على 17 رقم على فودافون كاش يا إما مش هتشوفوا إيهاب تاني وده اللي أنا فاكره من المكالمة لأن خالتي حنان كانت فاتحة المايك بتاع التليفون بتاعها وعمي أشرف راح على المركز بعد المكالمة دي وقالنا إن هو هيعمل محضر باللي حصل وثاني يوم الأربعاء عرفنا أن الشرطة لقيت الجزء السفلي من جثة إيهاب ابن عمي الله يرحمه وروحنا زي باقي الأهالي نشوف فيه إيه والأستاذ محمد عبد البديع كان بيدور معانا وبيسأل كل شوية لاقيتوا إيهاب ولا لسه وعملتوا إيه وبعد كده عرفنا أن الأستاذ محمد عبد البديع هو اللي قتل إيهاب ابن عمي في اوضة الدرس عنده وده كل اللي حصل وأعرفه.
ومن ناحية أخرى استمعت جهات التحقيق لأقوال أحد الشهود “تاجر أدوات منزلية”، حيث قال: اللي حصل وأعرفه أن يوم الثلاثاء 13/ 2 / 2024 لقيت في بوست نازل على فيس بوك بيقول إن إيهاب أشرف عبد العزيز متغيب عن البيت، فأنا علشان أعرف إيهاب وأبوه، لأن أبوه تاجر أدوات منزلية، فأنا قمت عامل مشاركة للمنشور عندي على صفحتي على فيس بوك وتاني يوم عرفت إن هما لقوا النصف بتاع جثة إيهاب اللي تحت.
وأضاف: مجاش في دماغي إنه ممكن حد يعمل كده بسكينة، وكنا مفكرين من الكلام اللي بيتقال في البلد إن اللي مقطع جثة إيهاب استخدم منشار علشان يقطع الجثة، ولما عرفنا أن الأستاذ محمد عبد البديع اتمسك، وإن هو اللي عامل كده وصوره بدأت تنزل على فيس بوك، وشوفت صورته افتكرت إن هو كان شاري مني سكينة تقريبًا، قبل أسبوع من الواقعة، وأنا مبقتش عارف إن هو فعلا قتله بالسكينة اللي شاريها من عندي ولا بحاجة تانية، لحد ما لاقيت ضابط المباحث من المركز بعتلي وسألني إذا كان محمد شاري من عندي سكينة ولا لأ.
وأردف: قولتله أيوه هو فعلًا اشترى سكينة من عندي، وقلت له على أوصافها، إن المقبض بتاعها خشب، والسلاح المعدن بتاعها تقيل ومحمل.. وهو جاي علشان يمثل الجريمة تأكدت أن هو اللي عمل كده.
