تامر حبيب عن إعادة عرض فيلم حب البنات بالسينما: القاعة كانت مليانة.. وكنت عايز أسجد لله شكرًا
أعرب السيناريست تامر حبيب، عن سعادته الكبيرة بإعادة عرض فيلم حب البنات، في سينما زاوية بمناسبة عيد الحب، حيث أن صالة العرض امتلأت بالشباب الذي دخل معهم في حوار عقب انتهاء الفيلم.
وكتب تامر حبيب، عبر حسابه الشخصي بموقع إنستجرام: كانوا عاملين عرض لفيلم حب البنات بمناسبة عيد الحب ومشكورين جدًا طلبوا مني أروح أحضر الفيلم وعملولي لقاء مع الجمهور بعد الفيلم ما خلص.. والجمهور اللي كان مالي كل كراسي القاعة ومافيش كرسي فاضي كانت طبعًا أغلبيتهم العظمى من البنات ويمكن 90 ٪ منهم كانوا أطفال أو لسة ماتولدوش لما الفيلم أتعرض أول مرة في 2004.
وقال حبيب: أنا راجع من العرض ده طاير من السعادة والبهجة وحاسس بنشوة لا تضاهيها نشوة.. الشباب كانوا بيسمعوا الحوار مع الفيلم وهو شغال، وكانوا بيصفقوا مع ظهور الممثلين كأننا في مسرح.. وبيغنوا ويرقصوا مع كل كلمة في كل أغنية في الفيلم.. وفاجئوني بتصفيق مدوي بعد الفيلم ما خلص كأنهم كانوا في مسرحية لعادل إمام.
وأضاف: مهما وصفت مش هقدر أعبر عن شعوري اللي حسيته من أول الفيلم ما بدأ لغاية دلوقتي حالًا.. وروح وبهجة وطاقة الشباب وهما بيحاوروني بعد الفيلم كانوا مخليني عايز أسجد شكرًا لربنا على أنه أنعم عليا بإحساس ماحستوش من زمان، أنا كنت قاعد وسط مجموعة من الشباب فاتحين عليا هويس حب وبهجة بجد ماتتوصفش.
واختتم تامر حبيب: شكرًا جدًا لكل واحدة وواحد خلوني أحس بسيل المشاعر ده، وشكرًا لصاحبة فكرة عرض الفيلم من أسرة سينما زاوية، وفي عيد الحب بعد عشرين سنة من عرضه، وشكرًا يا سينما أنك عندك كل هذا السحر.. وشكرًا يا أمي على دعائك ليا أن ربنا يحبب فيا خلقه، وأحب أطمنك يا ماما أن ربنا استجابلك من وسع.. وألف شكر وحمد ليك يا رب.
فيلم حب البنات
وشارك في بطولة فيلم حب البنات، مجموعة من الفنانين منهم، ليلى علوي، حنان ترك، خالد أبو النجا، أحمد عز، هنا شيحة، أشرف عبد الباقي، والعمل من تأليف نهاد عبد العزيز، وإخراج خالد الحجر.
