أحمد نبيل كوكا عن وفاة والده: ودعنا واحنا بنغسله.. وجاتلنا بشرى بأنه مبسوط
وجه أحمد نبيل كوكا لاعب وسط فريق الأهلي، رسالة إلى والده الذي توفي خلال الأيام القليلة الماضية.
وقال أحمد نبيل كوكا عبر صفحته الرسمية على موقع فيس بوك: آخر صورة لأبويا ليلة الجمعة اليوم اتوفى، كان قاعد لوحده برة بيتصور في البيت، كان عارف حبيب قلبي إن ده آخر يوم ليه في البيت، ده عمره ما كان بيتصور لوحده كده والله اتصور وساب الضحكة اللي في الصورة دي علشان نشوفها ونتأكد إنه رايح الجنة.
وواصل: والله والله والله أبويا ودعنا واحنا بنغسله بنفس الضحكة اللي في الصورة، كان نفسي تشوف كمية الناس يا بابا اللي كانت موجودة علشان أنا عارف إنك عارف الناس بتحبك كل الناس بتدعيلك والله وزعلانة عليك.
واستكمل أحمد نبيل كوكا كلامه: ربنا يقدرني يارب في اللي جاي وأقدر أعمل كل الحاجات الحلوة اللي كنت بتعملها والخير ومساعدة الناس اللي كنت بتعملها، جالنا يا حبيبي بشرى الصبح إنك مبسوط عندك ونفسي نجيلك أنا وأمي واخواتي في أسرع وقت ربنا يجمعنا بيك على خير يا بابا.
واختتم كاتبًا: حلمك أنا مكمل فيه والله وكل حاجه كانت بتفرحك هتتعمل على أكمل وجه، ربنا يرحمك ويغفر لك ويدخلك فسيح جناته والفردوس الأعلى من جناته، أشوفك على خير يا بابا سلام يا راجل يا طيب.
