خيري بشارة عن بداية دخوله السينما: كنت عاوز أكون مخرج عشان أمثل
روى المخرج خيري بشارة عدة قصص عن بداية دخوله لمجال السينما والفن، مشيرًا إلى أنه كان يرغب بالبداية في أن يكون مخرجًا ليصل إلى حلمه بالتمثيل.
وقال خيري بشارة خلال ندوته المقامة حاليًا في معرض الكتاب الدولي، تحت عنوان حياتي في السينما: بداية علاقتي بالسينما إن جدي كان بيسوي لحمة في الفرن، وبعدين يجيب أختي الصغيرة ويقفل عليهم وهما بياكلوا وإحنا بنشم ريحتها، وبنبقى جعانين فـ انتقامًا منه لما دخل الحمام روحت جايب سكينة من المطبخ وفاتح بيها دولابه وأخدت منه 10 جنيه، ودي كانت ثروة وقتها.
خيري بشارة: خرجت من فيلم يوسف شاهين أدور على اسم المخرج
وأضاف خيري بشارة عن بداية تعلقه بالسينما: بالفلوس دي روحت دار المعارف جبت كتب، وبعدين روحت السينما ومكنش في ذهني أكون مخرج خالص، وأتذكر إن فيه فيلم اسمه نداء العشاق، دخلت الفيلم وخرجت لأول مره أدور على اسم المخرج؛ لأني لقيت حاجات ممتعة، وطلع أنه يوسف شاهين.
وأكمل خيري بشارة حديثه قائلًا: كان ليا خال دارس في لندن وكان سايب شنطة، فتحتها وبدأت أعثر على كنز من الكتب، ولقيت فيها كتب من المسرح والسينما، فسألت أمي هو بيشتغل إيه؟، وكان وقتها عندي 13 سنة، وعرفت أن خالي ممثل في المسرح، وبدأت أقلده وأبعت للجرايد وتنشر، ووقتها كنت عاوز أبقى ممثل.
خيري بشارة: كنت عايز أكون مخرج عشان أمثل
واختتم خيري بشارة حديثه قائلا: خالي قالي عاوز تبقى من الكبار ولا الكومبارس، اسأل نفسك.. فاعتقدت أنه بيقولي أنت فاشل، ودخلت أوضتي أعيط وبالصدفة اشتريت كتاب اسمه فن الفيلم، قريته بسلاسة، ولقيت أن أهم شخصية هو المخرج، من هنا قولت هبقى مخرج عشان أمثل.
