محمد يسري: والدي أشفق عليّ من مهنة التمثيل.. ولا أمانع تقديم سيرته رغم خوفي لعدم إعطائه حقه

تحدث الفنان الشاب محمد يسري عن والده الفنان الراحل إبراهيم يسري، وسبب خوفه عليه من دخول مجال التمثيل، إلى جانب حديثه عن إمكانية تقديمه سيرته الذاتية في عمل فني سواء في السينما أو التلفزيون.

وقال محمد يسري خلال لقائه مع القاهرة 24: والدي ما كانش حابب أني أدخل مجال التمثيل واشتغل في المهنة، وأعتقد أي حد في كامل قواه العقلية مش هيكون حابب حد بيحبه يشتغل الشغلانة دي، لأن هي شغلانة صعبة نفسيًا وعصبيًا وفي فترات ممكن نقعد في البيت وما نعرفش الفلوس جاية امتى ولا إزاي.

والدي كان مشفقا علىّ من مجال التمثيل لأنه بيحبني

وأضاف محمد يسري: والدي كان شايف إني عندي موهبة التمثيل، لكنه كان مشفق عليا لأنه بيحبني، واتفقنا أني أدخل كلية واتخرج بشهادة مختلفة وأجرب اشتغل في مهنة تانية وأشوف هلاقي نفسي في مجال تاني ولا لأ، لكن من وأنا طفل عارف أنا عاوز إيه، وصعب حاجة تانية تخيلني أغير تفكيري.

وعن إمكانية السماح لأبنائه مستقبلًا بدخول الفن قال: مش هتعرض ومش هكون مبسوط لأني هكون مشفق عليهم.

وبشأن تقديم السيرة الذاتية لوالده في عمل فني قال:  لو مخرج تبنى العمل وحب إنه يقدم سيرة عن حياة إبراهيم يسري، وشاف إني مناسب إني اعمل كده مش همتنع أكيد لكن هيكون عندي تخوفاتي وعلى حسب اللي هقراه وأكيد هكون مبسوط، وتخوفي من إني مقدرش أعطي له حقه خاصة أنه أبويا فالموضوع حساس بالنسبة لي، وبشوف أن الفنان نور محمود هو الشخص المناسب لتقديم سيرته لأنه يشبهه في طريقة التمثيل.

وعن النصائح اللتي كان يواجها له والده قال: كان دايمًا بينصحني في كل حاجة، مش حاجة معينة وكان في نصائح عامة ونصايح ليها علاقة بالشعل وعلاقتنا كانت قريبة وفاكر كل حاجة قالها لي لكن مفيش حاجة بعينها.