عنبة يتحدث عن معاناته قبل الشُهرة: أكلت عيش بملح من قلة الأكل |فيديو
تحدث الفنان ومطرب المهرجانات عنبة عن معاناته قبل الشهرة، مشيرًا إلى أنه مر بأيام كان يأكل فيها العيش بالملح، وكان يعمل حتى يعطي فلوس للموزعين لعمل أغاني له.
وتحدث عنبة عن الأغاني التي طرحت في فيلم عصابة عظيمة والهدف منها ، خلال ندوته بـ القاهرة 24 قائلًا: في أغنية بتقول امسك قلمك وابدأ ارسم مش مشكلة راح ترسم إيه بس أكيد في حروف هتلعم تعرف منها بترسم ليه، والهدف منها إعطاء أمل للشباب لأن في ناس بتقول أنا بحاول ليه مش بنجح، والنجاح عند ربنا، ولو مش متوفق في الحتة دي مش معناه إنك بتعمل حاجة غلط لكن ممكن ربنا مش عاوزك في المكان ده فممكن تدور على سكة تانية، وأهم حاجة تعبد ربنا وتعمل اللي عليك في الدين.
وأضاف عنبة: أنا طول عمري كنت عاوز أكون حاجة لكن عمري ما كنت هفكر إني أبقى كده وأوصل لحلمي، خاصة أن الظروف كانت قاسية وكنت بشتغل علشان أجيب فلوس وأروح لموزع موسيقى يسجل لي أغنية لأني ما كنتش معروف، وحاليًا بدفع لهم برضه ويمكن أكتر من زمان لأن ده حقهم وهما بيتعبوا في الأغاني، لكن زمان كان صعب يعمل لي أحلى حاجة لأني مش نجم.
وأكمل عنبة: في أيام كتير نمت فيها من غير عشاء، وما كنتش أعرف يعني إيه العيش بالملح، لكني كلت عيش بملح في رمضان على الفطار وما كنتش مضايق.
وتابع: لما حد يتولد ويلاقي أهله عاملين له فلوس ومأمنين مستقبله دي نعمة مش حاجة وحشة، بس استغلها صح، وبقول للأهل اللي يسيبوا فلوس لأولادهم يهتموا كمان بتربيتهم.
في سياق آخر، تحدث عنبة عن المهرجانات قائلًا: المهرجانات هي المزيكا الحقيقية للزمن وإحنا زمن السرعة والمهرجانات هي المزيكا المصرية الحقيقة اللي بره يتفاجئوا بيها هنا.
