خالد يوسف ينفعل على طارق الشناوي بسبب فيلم الإسكندراني: أنا مبتشعبطش على اسم حد
رد المخرج خالد يوسف، على نقد طارق الشناوي، لـ فيلم الإسكندراني بطولة الفنان أحمد العوضي، حيث انتقد الشناوي رؤية خالد يوسف والتغييرات التي أدخلها على رواية الراحل أسامة أنور عكاشة.
وقال خالد يوسف في تصريحات مع برنامج مصر الجديدة للإعلامية إنجي أنور على قناة Etc: أنا التزمت بـ رؤيتي وأسامة أنور عكاشة مواقفه متفقة تمامًا مع مواقفي، هو راجل ناصري وثوابته الوطنية زيي ورؤيته في الحياة ومواقفه مشابهة جدًا لمواقفي، علشان كده مكنش غريب عليا إني أتبنى رؤيته وأقدم فيلم الإسكندراني بنفس رؤيته، أنا بعتز إني قدمته بروح أسامة أنور عكاشة برغم أنك لو قرأت السيناريو الـ 180 صفحة يا أستاذ طارق هتعرف حجم التغيرات المذهلة اللي أنا عملتها مع الحفاظ على روح أسامة أنور عكاشة.
خالد يوسف ينفعل على طارق الشناوي بسبب فيلم الإسكندراني: أنا مبتشعبطش على اسم حد
ووجه خالد يوسف رسالة شديدة اللهجة للناقد طارق الشناوي، قائلًا: أنا مبحبش الكلام اللي يتعمل عناوين والناس تصدقه، أنا أقدر أقول عنوان يقطم الرقبة، يعني فكرة محاولة الشعبطة على أسامة أنور عكاشة، زي ما حاولت اتشعبط على يوسف شاهين وكتبت زمان، أنا مابتشعبطش على حد يا طارق أنا طول عمري ناجح الحمد لله، أنت بتتكلم على 13 فيلم أنت نفسك قايل في مقالتك فيلمين مجابوش إيرادات، يعني بنسبة أكثر من 80 % أفلامي ناجحة ورائجة وبتدخل مهرجانات وبتنجح، فأنا مابتشعبطش على نجاح حد ولكن يشرفني أعمل عمل لأسامة أنور عكاشة.
ومن جانبه رد طارق الشناوي، على حديث المخرج خالد يوسف، قائلًا: الفيلم السينمائي يدافع عن نفسه مش المخرج اللي يدافع عنه، المخرج يعتبر أن الدفاع عن الفيلم قضيته وأنا نجم وأنا محصلتش وأنا اللي كسرت الدنيا وتاريخي وجغرفيتي لأ، الفيلم فيه مشاكل كتير، النهاردة حتى على مستوى الرقم ليس هو الأعلى، والواقع بيقول لما تنزل فيلم جديد لازم اللي قبله يتراجع، ورد عليه خالد والإيرادات متهكما برضه جزء من النقد العلمي ورد طارق بعيدًا عن الأرقام أنا مش فاهم يعني العوضي أختفى في الفيلم 10 سنين، شوفي صورته قبل 10 سنين وبعد 10 سنين لم يحدث أي تغيير في الزمن ودي مسئولية المخرج.
ورد عليه اجيبلك صورتك انت شخصيا في منتصف العشرينيات والتلاينيت مش هتلاقي فرق، وأكمل المخرج خالد يوسف، رده على الناقد طارق الشناوي، مؤكدًا أن نقده نابع من كراهيته له، قائلًا: أنا مبدافعش عن فيلمي، أنا بتكلم عن العناوين اللي أنت بتحطها، أنت بتقول بيتشعبط ودي كلمة مُهينة وأنا رديت عليها، النقد يا طارق ضلع من أضلاع الإبداع، مثلث الإبداع مبدع وجمهور وناقد، دي مسألة أنا مُسلم بيها، لما ألاقي حالة نقدية علمية قدامي هحترمها لو ماسكة الفيلم مشرداه، لكن الانطباعات الصحفية اللي أنت بتقدمها للناس على إنها نقد وفاكر إني لا أجرؤ أرد عليها؟ لأ هرد عليها يا طارق وهقولك دي انطباعات صحفية بتنم عن فكرة كراهية خالد يوسف لأني قولت عليك أنت مش ناقد أنت بتكتب انطباعات صحفية.
