تنازلت عن أغنيتي لـ عمرو دياب.. أبرز تصريحات محمد فؤاد مع ياسمين عز
حل الفنان محمد فؤاد ضيفًا على الإعلامية ياسمين عز، في برنامجها كلام الناس، المذاع عبر شاشة قناة MBC مصر، حيث عُرض اليوم الجزء الثاني من اللقاء.
أبرز تصريحات محمد فؤاد مع ياسمين عز
ونستعرض لكم أبرز تصريحات محمد فؤاد مع ياسمين عز:
- أنا حالف لـ بنتي بسملة أول ما حد ييجي يطلب إيديها هديله بالقلم، أنت مين علشان تاخد بنتي من حضني، ربنا يكون في عون كل واحد بيعيش الإحساس ده.
- تنازلت عن أغنية ميال لعمرو دياب، لأن وقتها هو سمعها من الملحن ونفذ الأغنية بدون ما ياخد باله إنها بتاعتي، وفوجئوا فيما بعد أنها أغنيتي.
-لو كنت أعرف إن أغنية ميال لعمرو دياب هتنجح كده، والله ما كنت اديتهاله لو كان عيط قدامي.
- أول مرة أسمع أن حد ملقبني بالـ زلزال، ولقب على خيبة إيه؟ عملنا إيه عظيم في الحياة علشان ناخد عليه لقب؟، أنا بخاف من الألقاب ومعتقدش إني أهل إن يكون ليا لقب، لو قولتوا عليا واد جدع يبقى تمام.
- كان نفسي أركب عربية BMW 700، وربنا كرمني وجبتها هي غالية أوي، طول ما أنا قاعد في العربية لو بصيت ولاقيت حد بسيط وفقير، بأنب في نفسي إني راكب عربية زي دي وغيري مش قادر.
- اعتزلت الحديث في كرة القدم مع أي أحد، لأنها تسببت لي في أزمة نفسية وفيه بلاد زعلت مني زي شعب الجزائر، وفي إحدى المرات كابتن مصطفى عبده طلب مني تقديم برنامج عن الكرة ولكني رفضت.
- عدم احترامي لمواعيد التصوير شائعة، وأنا اللي أعلّم الناس إزاي يلتزموا بالمواعيد.
- لا أتواصل مع حنان ترك ولكني بعتبرها أخت عزيزة على قلبي، وكل واحد مشغول في حياته حاليًا.
