متهم في قضية هدير عاطف: لما بلغت طليقها عن شكوى العملاء شتمني وقالي ملكش فيه|خاص
أدلى المتهم تامر زوج شقيقة طليق البلوجر هدير عاطف، في التحقيقات التي تجرى في اتهامه بالنصب والاحتيال على مئات الضحايا بحجة تشغيل أموالهم في تجارة السيارات والعقارات والبورصة بالاشتراك مع زوجته هاجر وشقيقها بلال وطليقته البلوجر هدير عاطف، باعترافات تفصيلية أمام جهات التحقيق.
تحقيقات قضية البلوجر هدير عاطف
ويواصل القاهرة 24 نشر أقوال المتهم الثالث في قضية هدير عاطف والمدعو تامر وجاءت كالآتي:
س: ما هو سبب تلقي بلال تلك الأموال من العملاء؟
ج: هو مفهم العملاء إنه بهدف الاستثمار في العقارات والسيارات والبورصة.
س: وهل كان بالفعل يتم الاستثمار في المجالات المار بياناها؟
ج هو بلال اللي عارف القصة دي وأنا معرفش عنها أي حاجة.
س: وما هو مضمون الاتفاق الذي يبرم بين العملاء وبلال المحرر بشأنه عقد الشراكة؟
دفع مبالغ مالية والحصول على نسب شهرية من الاستثمار في المجالات اللي قلت عليها.
س: وهل تحصل أي من العملاء على ثمة أرباح؟
ج أيوة
س: وضح لنا نسبة ذلك الربح وكيفية التحصل عليه تحديدا وكيف نمى إلى علمك حدوثه؟
ج: نسبة الربح دي كانت بين الناس وبين بلال وأنا معرفش عنها حاجة وبتختلف بين ناس وناس بناء على عقد الشراكة والناس لما كانت بتتصل على التليفون وتطلب النسبة بتاعاتها كنت ببلغ بلال وبيقولي أنا هحولهم الفلوس وساعات كان بيجيب الناس على البيت ويديهم فلوس في بيته.
س: وهل من ثمة خلافات نشأت بين أي من العملاء وبين بلال؟
ج أيوة هو بدأ يجيلي تليفونات من العملاء انهم بيطلبوا النسب بتاعتهم ولما كنت ببلغ بلال كان بيشتمني وبيقولي ملكش دعوة.
س: ومنذ متى نشب الخلافات المار بيانها؟
ج: هي بدأت الخلافات دي في آخر شهر 8 لكن من ساعة ما رحت من شهر 6 لحد شهر 8 الناس كانت بتاخد فلوسها عادي.
س: وكيف نمى إلى علمك تحصل العملاء على الأرباح الخاصين بالأشهر المار بيانها؟
ج عشان أنا اللي كنت مسئول عن الكول سنتر والناس لما كانت بتطلب فلوسها كانت بتاخدها ومبدأش يظهر مشاكل غير في شهر 8 لما الناس بدأت تتصل ويقولولي إن الفلوس اتأخرت وبدأ يحصل مشاكل.
س: وهل قمت بإبلاغ بلال محمود فاروق بشأن تأخر الحصول للعملاء على الأرباح؟
ج أيوة
س: وما الذي بدر من سالف الذكر؟
ج هو قالي ملكش دعوة وماتتدخلش في اللي ملكش فيه.
