مروة عبد المنعم لـ البيه والهانم: بيني وبين ربنا عمار كبير ومؤمنة إني في الجنة مش بالحجاب
تحدثت الفنانة مروة عبد المنعم عن ارتداء ابنتها الحجاب والانتقادات التي تعرضت لها، مؤكدة أنها هي الأخرى مقتعة بالحجاب ولكن الأمر سيحاسبه عليها الله فقط، وأن الجنة لا يدخلها أحد بسبب حجاب أو غيره، حيث أكدت أنها مؤمنة انها ستدخل الجنة أن بينها وبين الله عمار كبير.
وقالت مروة عبد المنعم خلال استضافتها مع ابنتها حور، في برنامج البيه والهانم الذي تقدمه الإعلامية نورين شحاتة مع ممدوح الشناوي على قناة القاهرة والناس: جات لي فكرة الحجاب في نفس سن بنتي وكنت في أولى إعدادي وقلت لماما قالت لي لما تكبري خدي القرار، كنت ساعتها عايشة روحانيات الحجاب خاصة أني كنت عايشة في السعودية.
لو بنتي قررت تخلع الحجاب مش هقف ضدها
وأضافت مروة عبد المنعم: مقتنعة جدًا بالحجاب وربنا عالم أنا ليه مش محجبة، وده حساب بيني وبين ربنا، وفخورة جدًا ببنتي وأتمنى ربنا يثبتها على الحجاب وسعيدة بالقرار اللي خدته، ولو جه عليها فترة وزهقت وخدت قرار تخلع الحجاب مش هقف ضدها.
بيني وبين ربنا عمار كبير وعلاقة خاصة
وردت مروة عبد المعنم عما إذا كانت ابنتها أحرجتها دينيًا وأخلاقيًا قائلة: أنا بيني وبين ربنا عمار كبير جدًا، وعندي علاقة خاصة بيني وبين ربنا ما يصحش أني أقولها لأني بحبها، وواثقة في ربنا وكرمه وحبه ليا وواثقة أنه بيحبني جدًا وبيبعت لي رسايل كتير جدًا وبيكلمني كتير جدًا.
وأضافت: مؤمنة أن ربنا بيكلمنا في كل لحظة ومن يستطيع أن يقرأ رسايل الله مش أي حد أنا بقرأ رسايل ربنا ليا، ومؤمنة إني في الجنة مش بالشعر نهائي، ومحدش عارف فيه إيه بيني وبين ربنا، وأنا أخلاقيًا الناس كلها عارفة أخلاقياتي ومش محتاجة أني أتكلم عنها ودينيًا ربنا وحده بس اللي عارف بيني وبينه إيه.
من ناحيتها كشفت حور ابنة مروة عبد المنعم تفاصيل ارتدائها الحجاب قائلة: مفيش حد من صحابي محجب يمكن اتنين تلاتة، وقبلها بيوم صحابي كانوا بيتكلموا في موضوع الحجاب وقلت لهم إني مش بفكر فيه وتاني يوم فاجئتهم، وكل الناس مقتنعة إني هقلع الحجاب في الصيف لكني مش هعمل كده.
وحول إذا كانت تنصح والدتها بارتداء الحجاب قالت حور: ده قرار شخصي وحاجة بينها وبين ربنا، ومش المفروض أي حد يقولها أتحجبي أو لأ، دي حاجة المفروض تكون مقتنعة بيها.
وردت حور عن إذ اكانت ستتقبل النقد في حال قررت خلع الحجاب: بصراحة مش بيفرق معايا كلام الناس أي حد يقول اللي عاوزه مش فارقة معايا، وشايفة ان محدش له دعوة بالتاني.
