الشغل عبادة.. صاحب تريند العروسة عاوزة دهب: مكنتش متخيل رد الفعل على البوست | خاص
العروسة عايزة تجيب الدهب.. كلمات في منشور تم تداوله عبر مواقع التواصل الاجتماعي، في ظل تذبذب أسعار الذهب المستمرة في السوق المصري، مما جعل له تفاعلًا واسعًا بين مستخدمي السوشيال ميديا.
العروسة عاوزة دهب يشعل مواقع التواصل
شاب عشريني عبر خلال حسابه الشخصي على فيس بوك، عن رغبته في العمل، معلنًا عن عمله كسائق توصيل طلبات أو ديليفري.
علي ياسر، صاحب ترند العروسة عاوزة دهب، شاب يبلغ من العمر 24 عاما، يسكن في مدينة برج العرب بمحافظة الإسكندرية، حاصل على شهادة بدرجة الليسانس من كلية الآداب قسم جغرافيا جامعة الاسكندرية.
قال علي لـ القاهرة 24، إنه استخدم حسابه على فيس بوك الذي يوثق علاقته بأصدقائه وجيرانه، ليكتب عليه منشور قائلًا: يا رجالة أنا شغال دليفري لو حد محتاج أي حاجة يكلمني..عشان العروسة عاوزة تجيب الدهب..البوست ده بجد مش هزار.
وأكد أنه لم يهدف إلى الحصول على مشاهدات وتفاعل رواد مواقع التواصل الاجتماعي، بل كان يسعى إلى الوصول لأصدقائه بشكل أسرع، موضحًا: كنت حابب أستخدم البوست عشان أوصل لكل صحابي وصحاب إخواتي بسرعة وكتبت كلمة عشان العروسة عايزة تجيب الدهب عشان تبقى ألشة وتضحك الناس.. بمناسبة إني لسة قاري فاتحة من أسبوع.
مشروع صغير
واستكمل: مكنتش متوقع التفاعل الكبير ده، وأخر حاجة شوفتها على البوست امبارح 9 شير على قد صحابي، لما خلصت شغلي انهاردة الصبح شوفت لقيته وصل لآلافات.
وأضاف: في فرص شغل كتير جات لي من البوست لكن أغلبها في محافظة القاهرة وعشان أنا من إسكندرية فالموضوع صعب بالنسبة لي في السكن والطرق، بس فيه فرص تانية في محافظتي ومنطقة برج العرب وكنت متحمس ليها.
وواصل: أنا كمان بحب الطبخ والمطبخ، فقررت إني أبدأ مشروع صغير مع واحد صاحبي، وهو محل بيعمل بيتزا وفطائر، وده جنب شغلي بتاع التوصيل.
مفاجأة العروسة
وعقب على مجال دراسته: اشتغلت فترة بعد تخرجي بشهادتي، بس حبيت أكتر مجال التجارة والمطاعم، والديليفري شغلانة جنب كل ده.
وأضاف أن الدراجة النارية التي يمتلكها، اشتراها كوسيلة مواصلات معتادة بين الشباب، وليس لتحقيق هدف توصيل الطلبات، قائلا: بس ربنا أراد إني أستخدمها دلوقتي في مشاوير شغلي.
وعلق على منشور فيس بوك: العروسة اتفاجئت أصلا بالبوست، أنا مأخدتش رأيها قبلها، وهي متضايقتش بالعكس فهمت الموقف وانبسطت من تفاعل الناس معايا.
الشغل عبادة
وأردف: فرص الشغل الي جاتلي في القاهرة أنا لسة معنديش الخبرة الكافية الي تخليني أنفذها، فعدلت البوست وكتبت.. أنا من إسكندرية، بس لو أي حد بيشتغل دليڤري فى أي محافظة تانية يبعتلي وأنا هنزل رقمه في الكومنتات.. وربنا يوفق الجميع، أملًا في مساعدة الشباب الذين يعملون بتوصيل الطلبات للمنازل.
وأوضح: لازم الشباب اللي مش لاقية شغل تسعى وتخلق لنفسها فرص، إحنا ربنا خلقنا عشان نعبده وعشان نسعى ونشتغل، طول ما أنت بتسعى ربنا هيكرمك.
واختتم حواره مع القاهرة 24، قائلا: نفسي مشروعي يكبر أنا وصاحبي.. ونعيش في استقرار وستر.. وأجيب الدهب للعروسة.
