بنتي نعمة ليه أخبيها في خزنة؟!.. أبرز تصريحات مريم الخشت ووالدها مع صاحبة السعادة
حلت الفنانة مريم الخشت، ووالدها الشيف عماد الخشت ضيوفًا على الفنانة والإعلامية إسعاد يونس، في برنامجها صاحبة السعادة، وتحدثا خلال اللقاء عن تفاصيل حياتهما الشخصية والعائلة الفنية ووالدتها الفنانة زينب مبارك، وتفاصيل لقائه الوالد بخطيب ابنته مريم.
ونستعرض لكم أبرز تصريحات مريم الخشت في برنامج صاحبة السعادة:
- اتبسطت جدًا لما اتعرض عليا مسلسل عملة نادرة لأنه صعيدي، كنت دايمًا متصورة إني هفضل محصورة في دور البنت الأرستقراطية اللي عينيها خضراء، ومفيش حد هيديني فرصة أجرب حاجة مختلفة.
- فكرت في سعادة بابا بإني بعمل دور صعيدي، إحنا من عيلة الخشت من المنيا.
- من وأنا صغيرة وأنا في لغة حوار بيني وبين أهلي، ومحستش أن في حاجة بتتفرض عليا بدون شرح أسباب، حتى لو عندي عيد ميلاد حد في الفصل في ابتدائي، لازم أهلي يسألوا عن أهله وشغلهم وبيتهم وتربيتهم، لكن عمر الأسئلة ما كانت من غير سبب.
- من وجهة نظري اللي ممكن يخنق أي حد إنه يحس بالقمع، وإن مفروض عليه شيء مش فاهمه، لغة الحوار كانت موجودة في كل حاجة.
- عمري ما حكيت لأهلي موضوع وحسسوني إن في حاجة أهم منه، وفي أي مرحلة في عمري أي موضوع كبير عندي كان كبير بالنسبة لهم.
مريم الخشت ووالدها مع صاحبة السعادة
- كان مهم جدًا من ومريم صغيرة تعرف أصولها وجدها الـ 11، الإنسان لما يعرف هو مين يحترم نفسه.
- الولاد نعمة، هل أشكر النعمة بإني أخبيها في خزنة؟!، أنا لو عندي لوحة حلوة أباهي الناس، وبنتي كده بالنسبة لي.
- بنتي حاجة جميلة مبسوط بيها، وبحب أسمعها وأتكلم معاها، وأتابع أعمالها وأشوف طريقة اختيارها لأدوارها.
- أول مقابلة بيني وبين خطيب مريم لقيته شاب لطيف لكن اتخضيت أول ما شوفته طويل جدا ومش عارف أسلم عليه من فين
- بنتي بتحبه يبقى لازم أحبه، وهو إنسان يتحب، وكمان أنا مشوفتش منه حاجة وحشة يعني مجتش معيطة منه في يوم، وهو من العائلة مريحة جدًا.
- أنا ومامت مريم كنا دايمًا بنكلمها من وهي بيبي بنكلمها كتير فمكنتش بتعيط أبدًا ما هي معندهاش فرصة ولا احتياج للعياط على طول فيه حد بيلاغيها ويكلمها كتير، ده خلاها اتكلمت بدري جدًا وخلق بينا لغة حوار.
- دايمًا كانت تحكيلي كل حاجة من وهي لسة في المدرسة، وأنا كنت ولازلت بحب اسمع كلامها جدًا واتناقش معاها.
