زياد ظاظا: أي حاجة بعملها بتدي الشباب جرأة.. وأيام تصوير فيلم 60 جنيه كئيبة | فيديو
تحدث مؤدي الراب والممثل الشاب زياد ظاظا عن خوضه أولى تجاربه في عالم التمثيل بفيلم 60 جنيه، وتعاونه مع المخرج عمرو سلامة، وذلك بعد مشاركة الفيلم في الدورة السادسة من مهرجان الجونة السينمائي.
وقال زياد ظاظا، خلال حواره مع القاهرة 24: دايمًا أي حاجة بعملها بتدي الشباب جرأة وجرعة قوة وثقة، وأنا لو قدرت أنت هتقدر.
وعن تعاونه مع المخرج عمرو سلامة، أضاف ظاظا: لو عمرو سلامة عرض عليا حاجة لازم أوافق، لأن ده عمرو سلامة وشيء كنت بتمناه من صغري، ومكنتش أعرف إني ممكن أمثل زي ما أنا متخيل.
وعن ردود فعل الجمهور تجاه فيلم 60 جنيه، أضاف زياد ظاظا: لقيت الناس مبسوطة من الفيلم فـ اتبسطت على حسب ما شوفت في وش الناس، ومبسوط بسبب كده، وأيام التصوير كانت كئيبة شوية.
وعن أغانيه وتوجيهها للشباب، اختتم زياد ظاظا حديثه: أنا شايف اللي هيفهمني الشباب اللي في سني وأصغر مني اللي بيعرفوا يتكلموا بنفس الطريقة، وأنا أقدر اتفاهم مع كل حد في نفس عمري، ولو محدش معايا هو اللي مش مواكب مش في الروشنة بتاعتي.
فيلم 60 جنيه
تبلغ مدة فيلم ستين جنيه 18 دقيقة، وتدور أحداثه حول زياد المراهق الموهوب، الذي يعيش في فقر مع شقيقه المعاق ووالدته، ومن خلال أحلام اليقظة الموسيقية نكتشف سرًا غامضًا تتورط فيه العائلة، ومن شأن هذا الرابط العائلي أن يمنح زياد الفرصة للبدء من جديد، والعمل من بطولة الرابر زياد ظاظا، ومدير التصوير هو أحمد طارق بيومي، ومن إخراج عمرو سلامة.
