أحمد حافظ: الأفلام القصيرة وسيلة تجارب ولدي فيلمان ينافسان على جوائز الأوسكار | فيديو
أعرب المونتير أحمد حافظ عن سعادته بمشاركته في الدورة السادسة من مهرجان الجونة السينمائي الدولي بفيلم 60 جنيها مع المخرج عمرو سلامة، والذي عُرض في حفل الافتتاح.
وقال أحمد حافظ خلال لقائه مع القاهرة 24: الأفلام القصيرة هي دايمًا بالنسبة لنا وسيلة للتجارب؛ عشان هي كده شيء محمس لأي فيلم ميكر، بنجرب نعمل حاجة جديدة ونتعلم حاجة جديدة، وفيلم 60 جنيه هو فيلم مختلف مش متعودين على طريقة الحكي ديه.
تصريحات المونتير أحمد حافظ
أما عن مشاركة مؤدي الراب زياد شاطر في فيلم 60 جنيه، أردف أحمد حافظ: زياد ظاظا شاطر جدًا جدًا، ويمكن ناس كتير ممكن متستوعبش الإطار بتاع الفيلم ولكن هي ديه ميزة الفيلم القصير إنه بيجرب طريقة حكي أو شكل معين في سرد مختلفة، وأعتقد إنها تجربة مختلفة ومميزة.
وعن تعاون أحمد حافظ مع المخرج عمرو سلامة، أضاف أحمد حافظ: عمرو سلامة شريك نجاح وبالنسبة لي صديقي جدًا جدًا ومن المقربين، الفيلم تجربة بصرية مختلفة تمامًا ده غير الحدوتة بتاعته، وحدوته حلوة جدًا وتجربة بصرية مختلفة، وما يميز شغلانة المونتاج إن مفيهاش صح وغلط.
واستكمل حديثه، قائلًا: طول ما أنا عندي وقت ببني المشهد، وممكن المخرج أوقات كتير يقولي مش عاجبني اللي حصل، فأهد وابني تاني، المونتاج زي البناء طوبة على طوبة بنوصل لشكل المشهد، وأنا محظوظ إني بشتغل مع أغلب المخرجين أصدقاء.
وعن فكرة عدم الاهتمام بالأفلام القصيرة كان للمونتير أحمد حافظ رأي آخر، قائلًا: كنا بنقول كده من فترة كبيرة بس شايف إن دلوقتي لا، فيه منصات دلوقتي بتعرض فيها الأفلام القصيرة وليها مهرجانات مخصوص فمقدرش أقول إنها مظلومة دلوقتي.
كما عبّر أحمد حافظ عن سعادته الكبيرة بتكريم المخرج مروان حامد في حفل الافتتاح، قائلًا: تكريم أستاذ مروان حامد هو تكريم لينا كلنا، الحمد لله بقى فيه انعكاس للثقافة السينمائية عند المجتمع والمهرجانات كلها بقيت بتقدر ده، وإحنا كصناع بصورة عامة لينا جزء في المهرجانات، مروان حامد مع حفظ الألقاب بعتبره أخويا مش صاحبي وتكريمه تكريم لينا إحنا مش عشان صديقي، هو بجد رمز، بيحقق نفسه وعنده مسيرة مختلفة عن أي مخرج تاني، فرق معايا بصورة شخصية في حياتي وأثراني بصورة كبيرة جدًا واتعلمت منه سينمائيًا وعلى المستوى الشخصي والعملي.
وعن ترشيح فيلمي إن شاء الله ولد وفوي فوي فوي للمنافسة على جوائز الأوسكار من أعماله بالعام الجاري، أضاف أحمد حافظ: فكرة المنافسة في الأوسكار بتخليني مبسوط جدًا جدًا، بالنسبة لي سنة مميزة جدًا؛ لأن فيها فيلمين اترشحو من بلدين مختلفين، وفيلم إن شاء الله ولد فيلم إنساني من الدرجة الأولى وأعتقد إنه يمس كل المجتمع العربي مش الأردن فقط، وفيلم فوي فوي فوي بيناقش قضية مهمة جدًا لسه شباب كتير بيقعوا فيها طريقة تناولها مختلفة جدًا، والمخرج وعمر هلال أول تجربة له بس أعتقد إنه رائع وشهادتي مجروحة فيه، وسعيد بالتجربتين جدًا جدًا.
