كنت مرعوب.. كريم قاسم يكشف كواليس مثيرة عن المشرحة في مسلسل زينهم |فيديو
تحدث الفنان كريم قاسم، عن كواليس مشاركته في مسلسل زينهم مع الفنان أحمد داود، والصعوبات التي واجهته، إذ روى تفاصيل مثيرة عن التصوير في لوكيشن المشرحة والمخاوف التي واجهته.
وقال كريم قاسم، في لقائه مع القاهرة 24، إن أكثر شيء لفت انتباهه عند عرض المسلسل عليه هو أن العمل مزيج بين الكوميدي والرعب والإثارة، وهو ما أثار مخاوفه وجعله يعترض في البداية.
وأضاف كريم قاسم: لما سمعت عن المسلسل من المنتج قلت له يعني إيه مسلسل فيه رعب وإثارة وكوميدي، خاصة إن ماعندناش الخليط ده، ومش عارف إزاي هنحقق ده واعترضت وقلت له يا نلتزم بالكوميدي أو الرعب، قال لي اقرأ وهنشوف، ولما قرأت المسلسل استغربت لأني بضحك في لحظات وفي لحظات مخضوض وخايف وهموت وعاوز أعرف إيه اللي هيحصل، وكل ما أقرأ أضحك أو استغرب وأخاف، وعاجبني السيناريو وكانت عجباني شخصية جيمي، وكان مكتوب حلو أوي، وكل الشخصيات اللي في المستشفى، وكان فيه تفاني جدا في تحديد الشخصيات فكنت سعيدا جدًا بالورق.
كريم قاسم يكشف أكثر ما أخافه في زينهم
وكشف كريم قاسم أكثر ما أخافه عند عرض المسلسل عليه قائلًا: أكتر حاجة كانت مخوفاني أني أصغر شوية في السن وأرجع تاني ودي حاجة بقاومها طول الوقت وكنت عاوز أكبر نفسي وأطول دقني وألعب أدوار أكبر، إلى جانب إني كنت متخوف من شخصية جيمي وعدم إظهارها بشكل كاركتير أوفر، فحاولت أخلي الكوميديا والخوف يكونوا من مكان حقيقي مش مفتعل، ودي كانت أكتر حاجة مركز فيها.
وعن استعداده لتقديم دور طبيب شرعي قال: اتكلمنا مع أطباء والمسلسل مأخوذ عن رواية حقيقية، والمؤلف محمد سليمان عبد المالك في الأصل طبيب، إلى جانب أن الدكتور رحمي في المسلسل هو في الأصل طبيب.
التصوير في المشرحة مرعب ويخض
وتابع كريم قاسم: أول ما روحنا المشرحة كان الموضوع مرعب أوي ويخض والواحد خد صدمة لأن كان شكلها حقيقي ومخيفة ومريبة واللوكيشن كان مبهر وكذلك اختيار المشرحة ومبنى المشرحة وده ساعدني في الشغل، وساعدني ككريم إني مش مضطر إني أمثل أني خايف لأني فعلًا كنت خايف.
كريم قاسم يكشف حقيقة التواصل مع الموتى
وعن حقيقة التواصل مع الموتى مثلما شاهدنا في المسلسل قال كريم قاسم: وأنا بقرأ الحلقات افتكرت فيلم اتفرجت عليه اسمه الحياة بعد الموت، ضمن الحلقات بيتكلموا عن الناس اللي عندهم هبة التواصل مع الأموات ودي هبة الناس بتتولد بيها، ولكن واحد على عشرة مليون بني آدم ممكن يكون عنده الهبة دي، وساعات ممكن يقول حاجة أو يسمع حاجة أو يوصل له رسالة بشكل ما مش واضحة وصريحة ممكن بإشارة إني موجود هنا أو خلي بالك أو صوت أو لمبة، وفعلًا طلبت من يحيى إسماعيل المخرج يتفرج عليه.
واسترسل كريم قاسم: في مدرسة للناس اللي بتتواصل مع الأموات في هولندا ودي مدرسة حقيقية، والموضوع كان عبث بالنسبة لي قبل ما أشوفه ولما شفته فكرت إن فعلًا احتمال يكون في ناس عندها الهبة دي أو التواصل مع العالم الآخر، وده ساعدني أحضر الشخصية، واتفقت مع يحيى إسماعيل أن الفرق بين شخصية زينهم وجيمي إن زينهم بيتكلم مع عقله الباطن وليس الأموات، ولكن جيمي بيبدأ يحصل له تواصل مع العالم الآخر بإشارت مش واضحة وهو مش فاهم ده، ولذلك فيه فرق واضح بين الشخصين.
واستكمل: كل مرة بيجي فيها ممثل أو ممثلة أو طفل عامل ميكب الحادثة أو إنه مضروب وفيه دم أو أي كانت الإصابة أو الجرح كان رد الفعل حقيقي ومخيف وكان الواحد بيتقبض وبيخاف وبنقعد وقت لما نمثل إننا دكاترة عادي متعودين على الجثة فالموضوع كان صعب.
