رانيا يوسف: تعرضت للتحرش وأنا مراهقة.. وأمي شايفاني غبية طول الوقت وكنت بشحت منها الاهتمام
كشفت الفنانة رانيا يوسف، تعرضها للتحرش في فترة المراهقة، بجانب حديثها عن علاقتها بوالدتها، وتعليقها على أزمتها الشهيرة بفستان البطانة.
وقالت رانيا يوسف في تصريحات تلفزيونية: تعرضت للتحرش وأنا عندي 18 سنة من شخص في دائرتنا، ولكن مش قريب مننا، والحق دايمًا على المتحرش، ونسبة الإغراء مالهاش دخل، اللي بيتحرش ده حد مريض، لأنه بيستغل الأطفال والستات وكمان الرجالة، يبقى أكيد حد مش سوي.
أما عن علاقتها بوالدتها، فعلقت الفنانة رانيا يوسف: ذكرياتي مع والدي أكتر لأن والدتي كانت مضيفة جوية ومكنتش موجودة في طفولتي، ولما بدأت أكبر بقى والدي هو اللي مش موجود وهي اللي موجودة، والدتي مكنتش قاسية ولكنها عملية طول الوقت.
وتابعت رانيا يوسف: لغاية النهاردة الاختلاف والفجوة بيني وبين أمي بتزيد، وفي مرحلة في حياتي كنت بشحت منها الاهتمام، وهي فيها عيب خطير إنها بتيجي على الغلطة اللي عملتها وتضغط، بتبقى عايزة تعلمني ولكن بطريقة قاسية شوية، وقبل جوازي من أبو ولادي اختلفت أنا وهي بسبب إني كنت عايزة أعمل بيت وهي بتقولي لأ مش مهم ومش مهم تخلفي.
رانيا يوسف: مش ندمانة على فستان البطانة
كما أكدت الفنانة رانيا يوسف، أنها لم تندم على إطلالتها المثيرة للجدل والتي عُرفت بـ فستان البطانة، قائلة: مش ندمانة على إطلالة فستان البطانة، ودي تجربة عرفت منها مين اللي بيضربني ورا ضهري ومين اللي عامل صاحبي وبيقوم عليا النقابة ويقوم عليا الناس.
