لا أكل ولا شرب ولا مأوى.. مصرية في فلسطين تستغيث للعودة: عايزة أرجع بلدي
استغاثت سيدة مصرية تدعى فاطمة محمد ربيع، أم لـ 3 بنات، تعيش في شمال قطاع غزة بفلسطين المحتلة مع زوجها وبناتها، أجبرهم الدمار والقصف المستمر على النزوح إلى جنوب القطاع، ليجدوا أنفسهم دون مأوى ولا مأكل ولا مشرب.
وخلال حديثها لـ القاهرة 24 استغاثت فاطمة من أجل العودة إلى مصر، قائلة: أنا دلوقتي أناشد كل الجهات المعنية، احنا قاعدين في الشارع دون أكل أو مايه أو مأوى، بعدما تركنا قطاع غزة.
وتابعت فاطمة، حديثها قائلة: قوات الاحتلال أجبرتني أنا وعائلتي على النزوح للجنوب وترك كل مانملكه لنجد أنفسنا في نهاية المطاف في الشارع دون مأوى أنا وأولادي في هذه الأجواء الباردة، ولما روحنا نحو الجنوب مفيش عندنا حدا في الجنوب، احنا مرميين بقالي 3 أيام في الشارع أنا وجوزي، وبناتي وأختي في الشارع ما عندناش فلوس، لا عندنا أكل ولا عندنا مية والحياة صعبة كثيرة، والوضع خطير.
واستغاثت فاطمة للعودة إلى مصر موضحة: أنا دلوقتي كواحدة مصرية وبناتي مصريين بناشد كل الجهات المعنية والجمعيات اللي في مصر، أنا عايزة أروح بلدي وسط أهلي، إحنا حياتنا في خطر، إحنا مهددين في كل ثانية، لا معانا فلوس ولا أكل ولا شرب ولا حاجة.. قاعدين في الشارع.
وأضافت: يعني لولا إن إحنا مضطرين إن إحنا ننزح مكناش طلعنا من بيتنا، إحنا اضطرينا نطلع من بيتنا من تحت القذائف، النار كانت فوق رؤوسنا أنا وولادي.
