وائل الفشني عن تبرعه بأرباح حفله القادم لغزة: ربنا ألهمني أتحرك ورجعت لكلام النبي.. وهدفع أجر الفرقة من جيبي
كشف الفنان وائل الفشني، أسباب تبرعه لأرباح حفله المقبل، المقرر أن يقام يوم 2 ديسمبر في ساقية الصاوي، لأهالي غزة، بعد العدوان الإسرائيلي الذي أسفر عن استشهاد مئات الأطفال.
وقال وائل الفشني في تصريح لـ القاهرة 24: مفيش حد حزين على غزة قدي.. كنت في حالة نفسية وحشة ورحت لسيدنا الحسين وانهرت هناك.. وكنت بعيط وأنا ماشي في الشارع بسبب مشاهد موت الأطفال.. وربنا ألهمني أتحرك وأغني وهدفع أجر الفرقة من جيبي.
وتابع وائل الفشني: كل واحد بيعمل شغلانة يبص للناس في غزة.. يعنى مطرب هيعمل حفلة طلع منها فلوس يتبرع.. وعايزين الحفلات تتفتح والدنيا كلها تشتغل عشان خاطر كل واحد بيشتغل يطلع حاجة لأهالي غزة.
وأوضح الفشني: الفلسطينيين بيقولوا ليا في تعليقات على فيسبوك أنت صوت الحزن اللى جوه قلبنا.. أنت صوت صراخات جوانا.. لما افتكرت الكلام ده قلت أكيد ربنا فكرني بالكلام تحمست.. وتشجعت أكتر أعمل حفلة رغم أحداث غزة عشان رجعت لكلام النبي لما قال لو القيامة بتقوم وفي إيدك زرعة ازرعها.. فقلت أعمل كده.. الحزن جوا القلب وإيدي تشتغل.
أسعار تذاكر حفل وائل الفشني
وكانت طرحت الصفحة الرسمية لمسرح ساقية الصاوي، أسعار تذاكر حفل وائل الفشني المقرر إقامته يوم 2 ديسمبر بحضور الجمهور، والتي جاءت على ثلاث فئات كالتالي: 150 جنيها، 200 جنيه، 300 جنيه.
ومن المقرر أن يقدم وائل الفشني باقة من أجمل أغانيه الذي يحبها الجمهور، وأبرزها أغنية يا مركب الغربة، راهب، وغيرها من الأغاني.
