معنديش بيت تاني.. مالك العقار المنهار بالقليوبية: كنت نايم وفجأة لقيت السقف وقع على السرير
شهدت قرية العمار الكبرى، التابعة لمركز طوخ بمحافظة القليوبية، واقعة انهيار عقار مكون من طابقين، بسبب انفجار ماسورة مياه.
القاهرة 24 تواصل مع مالك العقار لكشف ملابسات الواقعة، وقال مالك العقار إن المنزل انهار في تمام الساعة الخامسة صباحًا عليه وهو نائم.
وأضاف: صحيت لقيت المنزل منهار عليا، ولقيت ماسورة مياه الصرف الصحي انفجرت والمياه دخلت علينا وإحنا نايمين وانهار المنزل.. وكنت نايم ولقيت سقف الدور التاني وقع عليا، ولقيت مرة واحدة سقف الأوضة وقع على السرير اللي نايم عليه، وبعدها لقيت الحيطة وقعت عليا.
وأشار مالك المنزل المنهار بقرية العمار الكبرى إلى أنه لا توجد أي خسائر بشرية، حيث كان نائما في المنزل بمفرده ونجا من الحادث، مضيفًا: أبويا كان عايش معايا، وتويى، وبقيت أنا قاعد لوحدي.
واستغاث مالك المنزل المنهار بقرية العمار الكبرى، قائلًا: معنديش بيت تاني أروح له، وأنا نقاش ولكن قاعد من زمان ومش بشتغل.. البيت كان بقاله 90 سنة زي ما هو مبني ومش قادر أجدده، وكان مسقف بالخشب.
واختتم قائلا إن المياه التي خرجت من ماسورة المياه دخلت إلى المنازل المجاورة له، وكانت هناك خسائر مادية طفيفة.
