عفاف رشاد: زعلت إني مُتّ في مسلسل المداح وكان نفسي أكمل.. والسوشيال ميديا بوظت الدنيا
قالت الفنانة عفاف رشاد، إنها كانت تتمنى استمرار مساحة دورها في مسلسل المداح 3، بجانب رأيها في السوشيال ميديا والإشاعات.
وقالت عفاف رشاد خلال تصريحات خاصة للقاهرة 24: زعلت إني مُتّ في الجزء التالت من مسلسل المداح، وكان نفسي أكمل معاهم لكن مكنش فيه نصيب، بس الحمد لله كل عمل بطلع منه بصداقة جديدة وناس جديدة وإحنا في الوسط كلنا بنحب بعض.
وعن الشائعات التي تتداول عن الفنانين بين الحين والآخر، ردت عفاف رشاد قائلة: مش عارفة ليه الناس بيعملوا كده وبيستفادوا إيه من الإشاعات اللي زي دي.. واللي طلع الإشاعة فين مصدره الحقيقي.
وتابعت: السوشيال ميديا بوظت الدنيا إحنا مش عايشين مع بعض خالص، لو دخلتي في أسرة كنا زمان نلاقي الأب والأم عايشين مع أولادهم، وقاعدين معاهم وبيتكلموا مع بعض وياخدوا آراء بعض، دلوقتي كل واحد قاعد ماسك الموبايل وكل واحد مع نفسه، إنما تتجمعي وتقعدي مع الأسرة وتبني جيل قوي زي زمان ده مبقاش موجود، كل واحد مع نفسه للأسف السوشيال ميديا والحاجات دي عملت فترة من الفتور في حياتنا غريبة جدًا.
أخر أعمال عفاف رشاد
وحول جديد أعمالها الفنية، أوضحت عفاف رشاد أنها تشارك في مسلسل الفريدو، بطولة الفنان أحمد فهمي، والفنانة إلهام شاهين، الذي يعرض حاليًا على التلفزيون، متمنية أن ينال دورها إعجاب الجمهور.
