إلهام شاهين: مش بيهمني أتواجد فنيا كل سنة.. وبسأل ليه الفنانين بيصابوا بـ الزهايمر في نهاية حياتهم؟
تحدثت الفنانة إلهام شاهين، عن نجاح مسلسلها الأخير الفريدو، والذي يعرض حاليا، على قناة on، مشيرةً إلى إنها تحمست لتقديم مرض ألزهايمر بشكل كبير.
وقالت إلهام شاهين من خلال لايف للإعلامية بوسي شلبي، عبر حسابها الرسمي بموقع انستجرام، وعلى هامش حفل افتتاح مهرجان إسكندرية السينمائي: ردود الأفعال على الفريدو جميلة وبشكر كل زمايلي والجمهور والنقاد، وأنا بيستفزني وبيزود جوايا التحدي، الأدوار السايكو دراما اللي فيها حاجة عقلية.
إلهام شاهين: ليه الفنانين بيصابوا بـ الزهايمر في نهاية حياتهم؟
وتابعت إلهام شاهين: بتستهويني جدا النوعية دي من الأدوار وبدرسها كويس، وأنا قريت في علم النفس والمرض ده تحديدا كان شاغلني، لأني شوفت كتير من زمايلنا وفنانين عانوا من الزهايمر، وبدأت أسأل ليه الفنانين بيحصلهم كده في نهاية حياتهم، وأنا اتفقت على الدور قبل ما أقراه حتى.
إلهام شاهين: أنا مجنونة تمثيل ومش واخداه كـ مهنة
وأضافت إلهام شاهين: أنا في المطلق سخيفة لما بيتعرض عليا أدوار، ومش بقول إني متحمسة وبقعد أقولهم لا لازم ألاقي حاجة جديدة لأني عملت كل حاجة خلاص، لكن لما المنتج قالي دور واحدة عندها زهايمر قولتله من غير ما أقرا أنا مضيت أهو، ومش بيهمني أتواجد كل سنة لأني مش واخدة التمثيل مهنة وأنا مجنونة تمثيل.
واختتمت إلهام شاهين حديثها قائلةً: أنا بدأت اظبط شكل الشخصية من أول ما قالولي زهايمر، قبل التصوير بشهرين، فخدت مني فترة تحضير وبحث، برغم إن مكنش غريب عليا الشخصية لأني عيشت مع ناس كتير عندهم زهايمر وفنانين وده مخزون بيبقى جوانا.
مسلسل ألفريدو
يعرض حاليا مسلسل الفريدو، المأخوذ عن كتاب 55 مشكلة حب للدكتور مصطفى محمود، على قناة on، وهو من بطولة الفنانة إلهام شاهين، وكل من: أحمد فهمي، ندى موسى، عمر شرقي، أمير شاهين، وغيرهم، والعمل من إخراج عصام نصار.
