محمود البزاوي: الأب اللي بيقول أنا عارف كل حاجة جاهل.. وحميت نفسي من علقة بسبب ابني
كشف الفنان محمود البزاوي أسلوب تعامله مع أولاده، مشيرا إلى أنه لا ينتقدهم ولكنه يُقدم لهم النصائح بشكل غير مباشر، مؤكدًا أن الأب الذي يدعي لأولاده بأنه يعلم كل شيء في الحياة، هو في الأساس أب جاهل لا يعلم شيئا.
وتحدث البزاوي عن طرق تربيته لأولاده، في تصريحات تليفزيونية، قائلا: أنا اكتشفت حكاية أنك تكون عارف كل حاجة في الدنيا، أنك مش فاهم حاجة خالص، عمري ما بنتقد أولادي ولا أقطمهم، لما بكون خايف على أكرم ابني فبيقولي يا بابا ليه بتعمل كده؟ بقوله في حق صغير بيني وبينك فاسمح لي بالحق ده، أني أسأل عليك، وأشوفك هتتأخر ولا لأ وهكذا.
وروى محمود البزاوي موقفًا له مع نجله، وحاول من خلاله أن يقدم له نصيحة بشكل غير مباشر، فرغم أن نجله في هذا الوقت كان صغيرًا، إلا أنه أراد أن يعطيه حكمة من موقف مرا به، موضحًا: كنت لسة بتعلم السواقة، ومعايا ابني جنبي، وأنا في فيصل في ميكروباص جاي غلط فدخل في العربية، أكرم ابني أتخض، لأن نزل من العربية 4 رجاله شكلهم كبير ويخض، وكانوا نازلين على خناقة، محبتش اتخانق قدام ابني، نزلت لهم لميت الموقف وهزرنا سوا.
وتابع البزاوي: أكرم كان بيعيط، قلت له كان ممكن أنزل وأتخانق وأعمل فيها شجاع وأترن علقة، لكن حميت نفسي من العلقة عشانك، دايمًا بدي له نصائح من خلال الفعل، لو انضربت قدامه كان هيتكسر، بس وضحت ليه أن اللي حصل دا لا يمنع أن أبوك ممكن يتضرب عادي.
وأضاف البزاوي: من وابني لسة بيمشي كنت بتكلم معاه في حياتي الشخصية، باخده من ايده وامشيه تاتا تاتا، لأن في المستقبل هو اللي هيمسكني ويسندني، لو مكنتش أمين عليه هنا، مش هيكون أمين عليّ هناك، لكن لو قُلت له أنا أبوك وعارف كل حاجة، بقيت أب جاهل.
محمود البزاوي: أبويا كان بيشتغل 3 ورديات في اليوم ومكناش بنشوفه
وتحدث البزاوي عن والده: أبويا كان راجل طيب جدًا ونفسه يشوف عياله أحسن حاجة، كان عامل في شركة غزل ونسيج وأُمِي، لكن اتعلم في مدارس الشعب، اللي عملها عبد الناصر وقتها، وأمي ست فلاحة عادية، أبويا كان بيشتغل 3 ورديات في اليوم، مكناش بنشوفه لكن بنلتقي في الفطار أو الغدا، كان بيتنا دافي وفي ألفة بينا، ممكن أكون خدت منه طيبته في التصرف والسلوك، المسألة نسبية وأنت بتحكم أمورك حسب بيئتك وثقافتك ووعيك.
