أزهري: مينفعش تردي على جوزك وقت غضبه انتي بتوصليه إنه يضربك ويهينك
أجاب الشيخ عبده الأزهري، العالم بالأزهر الشريف على سؤال ورد نصه: أنا جوزي عصبي جدا وكل شوية كنت بغضب عند أهلي ورفعت عليه قضية خلع، وبعدين رجعنا لبعض تاني وبقينا كويسين وقاللي مفيش ضرب وإهانة تاني وقام رجع تاني ضربني وضرب ابنه فقلت له أنت محرم عليا زي أبويا وأخويا فما حكم ذلك؟.
الرجل العصبي يمتلك ضعفا في شخصيته
وقال الأزهري، خلال تصريحات تليفزيونية: كلامك لزوجك أنت محرم عليا أو الكلام من هذا القبيل لا قيمة له، ولا يُعد من الظهار، ولا يحرم عليكِ، ولكن لا تقولي مثل هذا الكلام مرة أخرى.
ووضع الأزهري روشتة للنساء في كيفية التعامل مع الزوج العصبي، موضحا أن الشخص العصبي هو شخص غير قادر على أن يتحكم في نفسه وقت الغضب، والدليل على هذا أنه في وقت آخر يكون طبيعيا وغير غاضب ويتعامل بشكل جميل جدًا، بالعكس ما يكون عليه في وقت عصبيته فيتحول إلى شخص معاملته سيئة جدًا، والشخص العصبي اللي بيقول كلام، ويرجع بعد كده يعتذر، وبعد كده يرجع يضرب ويرجع يتضايق من نفسه يكون كل هذا نابع من ضعف في شخصيته.
وأضاف: هذا الشخص العصبي حله هو عدم الرد عليه في وقت غضبه، ونسكت ونقوله أنت صح، ونقول حاضر، ونحافظ على البيت، وهو ممكن يكون تغيره صعب لكن الحل في إيدك انتي، فلو قولنا حاضر، ونعم ومعاك حق وعدينا الموضوع، لما يبقى رايق هتعرفي تتكلمي معاه، وهيبقى شخص جميل، وبإيدك تطلعي الخير اللي جواه، وبإيدك تكبري الموضوع وتوصليه للإهانة والضرب، والشتايم، والمحاكم فالحل في إيدك انتي، وأنا لا أقر بأن الأمر الذي يفعله زوجك صحيح بل بالعكس هو على خطأ، ولكن بإيدك الأمر.
وواصل العالم الأزهري: الكلمة كيميا؛ فيها إيه لو واحد متعصب وغضبان مراته قالتله أنت معاك حق، وأنا آسفة، إيه اللي هيحصل هل هيجي يضربني، أو يشتمني؟ وهنا نفرق بين الإنسان الطبيعي، والإنسان غير السوي، لازم نطبطب على بعض في ظل الضغوط اللي بقينا فيها دي؛ فمفيش راجل أو ست عاوزين بيتهم يتخرب، وإحنا لازم نتعامل بالتعامل المناسب مع بعضنا بعضا؛ مراتك لو زعلانة ومنهارة وبتبكي مينفعش تقف تحاسبها، خدها في حضنك لحد ما تهدا وتستكين وبعد كده حاسبها، ونفس الكلام ينطبق على الزوجة مينفعش تقفي قدام جوزك وهو غضبان.
