أبرز تصريحات أكرم حسني مع معتز الدمرداش: مكالمة عادل إمام خففتني وبعيش لحظات استثنائية
حل الفنان أكرم حسني، ضيفًا على الإعلامي معتز الدمرداش في برنامجه ضيفي، المذاع عبر شاشة قناة الشرق، وتحدث خلال اللقاء عن تفاصيل مشواره الفني وعلاقته بالزعيم عادل إمام وسر مكالمته، وتعاونه مع الفنان تامر حسني، وهيفاء وهبي.
ونستعرض لكم أبرز تصريحات أكرم حسني مع معتز الدمرداش:
- أنا مجربتش أعمل دور تراجيدي ومفيش فيه مقومات الضحك، أنا مختبرتش نفسي في ده ولو كنت أحب، وعلشان كده أنا بـ أصنف كوميديان لأني من ساعة ما بدأت كل اللي بقدمه كوميدي.
- سيد أبو حفيظة ده وش الخير والسعد، وسبب حاجات كتير أوي ربنا كرمني بيها.
- لغاية اللحظة اللي بنتكلم فيها دي في مسلسل في رمضان.
- أنا بعيش لحظات استثنائية بسبب نجاح فيلم العميل صفر، وكل زملائي الفنانين أساتذة كبار وعملوا مجهود كبير وأعمال حلوة جدا وفكرة المنافسة مين إيراداته أكبر من مين والله عمرها ما شغلتني، كل اللي بيشغلني إني أعمل فيلم حلو.
- تعرضنا لموجة من الهجوم في مسلسل رجالة البيت، وفيه منها الحقيقي والموضوعي، واللي راجعنا نفسنا فيه لأننا أكيد كنا مُقصرين بشكل أو بـ آخر.
- أنا فخور لكل حاجة عملتها بشكل منفرد، وأنا بحب الموهبة اللي ربنا مديهاني وبحب أوظفها أن الناس تتبسط وأنا اتبسط.
- أستاذ عادل إمام تاريخ كبير وعطاء واستمرارية أنا مشوفتش زيها، وله أكتر من دور في حياتي وأنا حافظ الحاجات اللي بيعملها عن ظهر قلب، وبشكل ما هو مأثر في وجداني الفني.
- جاتلي مكالمة تليفون من الزعيم عادل إمام أول ما بدأت أعمل سيد أبو حفيظة كانت كلها تشجيع، وغيرت مزاجي وحالتي الصحية بعد ما كنت تعبان خفيت
- أنا أسست شركة الإنتاج اللي بنتج بيها دلوقتي من 13 سنة، ومؤخرًا بدأت أحس إن موضوع الأغاني أخد شكل احترافي شوية معايا، فقولت ليه معملش ده؟
- الكينج محمد منير صديق شخصي من 2013 وكان مشجع جدًا ليا من وأنا بقدم أبو حفيظة، وفي مرة طلب مني أكتب له أغنية وحاولت أشتغل فيها ولكن متوفقتش.
- ولكن كان بيزن في دماغي اعمل حاجة للكينج لغاية ما جه وقت جاتلي فكرة للي، واتكتب في الـ CV بتاعي إني اشتغلت مع واحد من عمالقة الفن المصري.
- سمير غانم له في قلبي مكانة، هو كان عنده ملكة الارتجال مش طبيعية، وكان ليا الشرف إني قعدت معاه في مسلسل لهفة، وهو موهبة جبارة.
- تامر حسني موهبة كبيرة وعنده خفة دم بالفطرة، وعنده أفلام كتير ناجحة قبل فيلم البدلة بتاعي أنا وهو، وهو شايف الجمهور وعارفه وعارف إيه اللي بيضحكه، واتعلمت منه أن كوميديا الحركة مش دايمًا مرفوضة هي بس نوظفها في مكانها.
- دايمًا بقول أن في راجل صاحب فضل عليا اسمه المخرج محمد كوينة، هو كان في نجوم FM، هو من خلال شركة الإنتاج اللي شغال فيها عرض عليهم اسكتشاتي وبالصدفة كانوا بيعملوا برنامج كوميدي، وكتبت نشرة الأخبار وقدمتها بشخصية أبو حفيظة.
- أنا استمتعت جدًا بالتعاون مع هيفاء وهبي على المستوى الفني والإنساني، وحبيت خفة دمها واختلافها وتقبلها لحاجة جديدة ممكن متبقاش شبه شخصيتها.
