بشرى عن أزمة أولاد حريم كريم: طارق الشناوي مش بيمدح حد.. واللي عمله خلق حالة من السلبية حول الفيلم | فيديو
تحدثت الفنانة بشرى عن الأزمة التي حدثت مؤخرًا بين الفنان مصطفى قمر والناقد الفني طارق الشناوي، بسبب فيلم أولاد حريم، بعد انتقاد طارق للفيلم ووصفه بأنه من أسوأ الأفلام المعروضة بالسينما كما وصف قمر بأنه مطرب فاشل.
وقالت بشرى في ندوة تكريمها بالقاهرة 24: إحنا حافظين طارق النشاوي من زمان وعارفين أنه مش بيمدح حد، ولكني متفاجئة من الناس اللي متفاجئة، ومتفاجئة أكتر من رد فعل مصطفى قمر ورده عليه.
وأضافت بشرى: خلينا متفقين على إن النقد سمة أساسية من سمات صناعة السينما، وزي ما في بايع فيه شاري، والجمهور على راسنا أيا كان ولكن لما يكون جمهور حقيقي مش لجان إلكترونية، ونفس الشيء لما يكون الرأي مهني هيكون على راسنا لكن لو شخصي يبقى موضوع آخر، وأنا شايفة أن ده حوار شخصي الفيلم اتسحب ليه ومش قضية الفيلم.
وكشفت بشرى عن رأيها في رد مصطفى قمر على طارق الشناوي: قائلة: هو مسؤول على رده والاتنين أكبر مني بكتير، والاتنين ناضجين كفاية وهما عارفين بيقولوا إيه وبيتكلموا إزاي وبيردوا على بعض إزاي وكل واحد كفيل بنفسه، وكل اللي بتكلم فيه أن حرام الفيلم يظلم ويختزل نجاحه ورأي الجمهور اللي حب الفيلم لأن فيه مع وضد، زي النقد فيه أقلام كتير كتبت بشكل إيجابي وقلم اعترض، وعادي لأن مش طبيعي نرضي جميع الأذواق.
وواصلت بشرى: أنا بقى لي سنين في المهنة واتكتب عني من نقاد كبار وأنا محظوظة بالآراء النقدية طول مشواري، والنقد لما يكون نقد مهني بشكل مهني مدروس ده شيء مفهوم وعلى راسي، والناقد من حقه يتكلم على أداء الفنان في إطار العمل مش بره إطار العمل، وأنا كبشرى بغني وبمثل وبانتج لكن لو أنت كناقد لو أنت داخل تشوف لي فيلم هتتكلم على بشرى الممثلة مالكش دعوة بالمطربة، فهمم جدًا نراعي السياق والنقد طول عمره موجود ولا تكتمل العملية الفنية بدون نقد فني مهني مبني على إطار علمي..
التنمر حارمنا من الإبداع وأي حد معدي بيقول أي كلمة
أما عن رأيها في حساسية الفنان تجاه النقد قالت: حطوا نفسكم مكان الفنان إحنا بقينا في سنوات مفتوحة بشكل مرعب وأي حد معدي بيقول أي كلمة ونفصل إزاي بين الرأي والتنمر والتجريح وأشياء يعاقب عليها القانون، نفس الشيء إزاي نفصل بين النقد والتنمر، لأن التنمر حارمنا من الإبداع علشان المبدع بيكتب وبيفكر ألف مرة لأن هو لما بيكتب خايف أن الكوميديا تتفسر تنمر ومش بيكتب بحرية، فليه رابط إيد المبعدين خوفا من التنمر واجي على النقد والسوشيال ميديا واللجان واسمح بالتنمر إحنا كده بنكيل بمكيالين فلازم يكون فيه قوانين ونمشي عليها صح.
واستكملت: ولذلك ما ينفعش المتخصص يتكلم بلسان السوشيال ميديا، المتخصص المفروض يوجه الرأي العام لأنه فاهم المهنة والصناعة وإحنا محتاجين إعادة تنظيم للمنظومة لأن فيه حاجات عشوائية كتير.
وأشارت بشرى إلى أن هناك بروتوكولات في العالم ملزمين بقوانين تمنع نقد الفيلم قبل شهر من عرضه، حتى لا يتأثر الجمهور برأي الناقد، قائلة: طارق الشناوي نقد الفيلم بعد أسبوع واحد من عرضه، على الرغم من أن فيه بروتوكولات في العالم تمنع النقاد من الحكم على العمل قبل شهر من عرض الفيلم علشان مأذيش الصناعة ويحجر على رأي الجمهور، ومحدش له الحق أنه يحجر على رأي الجمهور لا الفنان ولا الناقد.
كلام طارق الشناوي مأذاش الفيلم ولكنه خلق حاجة من السلبية
وأردفت: الحمد لله كلام طارق جه بعد ما كان فيه أقلام إيجابية كتبت عن الفيلم وناس دخلت وعامل إيراد 3 مليون جنيه إن لم يكن أكتر شوية، وأعتقد كلام طارق الشناوي مأذاش الفيلم ولكنه خلق حاجة من السلبية حول الفيلم لدرجة الناس رايحة تتفرج وتشوف غيه الفيلم اللي عليه خناقة واكتشفوا انه مش سيء ولا حاجة لأن فيه رأي كتير من الناس شافوا الجزء التاني أنضج من الأولاني وفيه امتداد وعجبهم.
