سامي مغاوري: برتاح مع دنيا سمير غانم لأنها بتديني ثقة على المسرح.. وفيه زملاء كانوا بيحسسوني إني رايح أخلع ضرسي
تحدث الفنان سامي مغاوري عن مشواره الفني، مشيرًا إلى أن 40 سنة هي مدة احترافه ولكنه بدأ تمثيل منذ أن كان بعمر 7 سنوات، كما تحدث عن المسرح وتعاونه مع دنيا سمير غانم وغيرها من الأمور.
وقال سامي مغاوري خلال لقائه في برنامج الستات ما يعرفوش يكدبوا: 40 سنة دول يعتبروا فترة الاحتراف ولكن أنا بدأت الفن قبل كده بكتير جدا من سن سبع سنين، واتكونت تكوين فني خاص ووجهة نظري إن الفن له ضرورة حياتية، وأنا بحب الظهور دايما كشخص عادي بخلص تصوير بمشي في الشارع ونروح سوبر ماركت ومولات أنا ومراتي وعايشين طبيعي، والناس تكلمني وتتصور معايا وأنا سامي مغاوري المواطن.
وأضاف سامي مغاوري كاشفا أنه غير راض عن مشواره الفني بشكل كبير موضحًا: بحس إني لسه ما عملتش حاجة، أنا ليا دور في الحياة أكبر من كده وعاوزة أقدمه وأكون فاعل في المجتمع مش مجرد نجم وأظهر وصوري في المجالات أو الناس تتكلم عني، ولذلك مش بقبل أي حاجة، وبرفض أدوار كتير زي الأدوار اللي مالهاش مضمون أو الأعمال اللي بتعمل رد فعل سلبي في المجتمع، ومش بحب كده، وأنا عارف أن دوري كممثل بصفة عامة ودوري بيصل للوجوه والأقاليم وفي جميع الدول العربية، ولذلك لازم أكون مؤثر في حاجات فنية.
وتابع سامي مغاوري: ماليش مستشارين فنيين وبستشير مراتي في ظهوري ولبسي، وبستشير ابني في الحاجات الفنية، ومراتي كذلك بيكون لها وجهة نظر وأحيانا بتقولي أرفض دور معين، وبشكل عام دماغي هي مستشاري الفني.
وعن أكثر النجوم الذين يضحكونه قائلًا: أنا زي العيال الصغيرين بضحك بسرعة، ومن الفنانين اللي بيضحكوني بيومي فؤاد وشيكو وهشام ماجد ومحمد ثروت ومن جيل الوسط محمد سعد ومحمد هنيدي.
سامي مغاوري يتحدث عن تعاونه مع دنيا سمير غانم
كما تحدث سامي مغاوري عن تعاونه مع دنيا سمير غانم في جت سليمة قائلًا: طالما فيها دنيا سمير يبقى أحد أسباب النجاح الرئيسية لأني برتاج نفسيا وأنا شغال معاها بالإضافة للمخرج إسلام خيري اللي اجتهد جدا وهو مخرج جميل وكبير ومجتهد وأعماله ناجحة.
وأشار سامي مغاوري إلى أنه يشعر بحالة من البهجة خلال العمل مع دنيا سمير غانم على المسرح قائلًا: وأنا شغال مع دنيا سمير غانم بكون مرتاح نفسيا، لأن نوع من الكوميديانات الممثلات أو الممثلين لما يلاقي ممثل جمبه بيجمح للكوميدي أو هيكون دمه خفيف ممكن يقفل عليه أو يضايقه أو ينظر عليه ويقول له بلاش، ده مش موجود عند دنيا.
فيه زملاء كانوا بيحسسوني إني رايح أخلع ضرسي
وأضاف: حتى في المسرح وإحنا واقفين معاها وبالرغم من أنها نجمة العرض وبتغني وبتمثل ومع ذلك بتضحك مع الجمهوره على إفيهاتي وبتدينا ثقة وبتخلي الواحد حاسس بحالة بهجة وبروح المسرح وأنا مبسوط مش مبتأس وكأني رايح أخلع ضرسي لأن كان فيه زملاء كانوا بيحسسوني إني رايح أخلع ضرسي وبيكونوا مقفلين أوي وطالما روايته والأفيش باسمه فلازم هو اللي يضحك وإحنا على المستحي كده.
