جميلة عزيز تكشف تفاصيل تخلي خطيبها وصديقتها عنها: القرآن والصلاة غذوا روحي ونسيت
كشف الفنانة جميلة عزيز تفاصيل تخلي خطيبها وصديقتها عنها بعد تعرضها لأزمة صحية مفاجئة، مشيرة إلى أنها أصبحت لا تثق في أحد.
وقالت جميلة عزيز في لقائها مع القاهرة 24: كنت مخطوبة ولما خطيبي عرف مرضي تخلى عني في سبيل أنه عاوز يعيش حياته ويسافر، وكنا عايشين مع بعض قصة حب ومع بعض سنين وهو اللي حبني وقرب مني واتكلمنا كتير بعد ما أتعرفت عليه عن طريق والدتي لأنه كان دكتور وبيعالح والدتي.
وأضافت جميلة عزيز: ما عتبتوش لأني ما ينفعش أعاتب، والمفروض كان يقف جمبي ولو حتى بالسؤال مش مرة واحدة تختفي تماما، وأنا نسيته تماما لما اتجهت للصلاة والدين وبقت هي دي الحياة اللي شغلاني أني أقرأ في الدين والأحاديث وهي دي الحاجات اللي غذت روحي وقلبي والحمد لله بعدت ونسيت.
وأضافت جميلة عزيز: ما بقاش عندي ثقة في حد، لأن أكتر وقت صعب مريت بيه مالقتش الإنسان اللي كان المفروض يقف جمبي ولو حتى برسالة يبعتها، وما بقاش عندي ثقة في راجل أو في صديقة وثقتي كلها في ربنا.
واستكملت: اللي مريت به علمني حاجات كتير وربنا عاوز ينور بصيرتي ويوضح لي الطريق ويوريني الناس الكويسة من الناس اللي مش كويسة، ويمكن تعبت علشان أبعد عن الناس دي لأن كل حاجة ليها سبب، واتعلمت أن الاهتمام والحب يكون لله فقط هو اللي هيديكي ويقف جمبك وهيسخر لك الناس اللي تقف جمبك.
كما كشفت أن صديقتها المقربة من الوسط الفني تخلت عنها قائلة: كانت أقرب واحدة ليا وكنت بحبها وكانت بالنسبة لي أخت وكانت بتنصحني وكنت معاها في كل المناسبات.
ووجهت جميلة عزيز رسالة إلى صديقتها التي تخلت عنها قائلة: لو أنا عدوتك المفروض تسألي عليا لأن الغريب سأل عليا وفي ناس كتير مش بكلمهم سألوا عليا وناس كتير قريبين وبيني وبينهم عيش وملح وما سألوش وناس بعاد قربوا وسألوا واهتموا.
جميلة عزيز تكشف مواصفات شريك أحلامها
وكشفت جميلة عزيز مواصفات الشخص الذي ترغب في الزواج منه قائلة: الراجل مهم في حياة أي واحدة ولكن لازم يكون عنده مواصفات معينة، زي أنه يكون عنده ضمير ومخلص ومتدين ويخاف عليا ويحترمني وبيحبني حب صادق، يعني يكون راجل بمعنى الكلمة مش مكتوب في البطاقة فقط، وأحس أنه سند يسأل عليا ويخاف عليا ويكون حنين.
