سائق ميكروباص بالبحيرة يخصص سيارته لمساعدة المواطنين غير القادرين بالمجان
أطلق الشاب حسن السعدني، سائق ميكروباص مقيم بمركز أبو حمص بمحافظة البحيرة، يعمل على طريق أبو حمص - أبو هواش، مبادرة خيرية حيث خصص سيارته من أجل نقل المواطنين غير القادرين مجانًا دون تحملهم تكاليف الأجرة والمواصلات، حيث علق لافتة داخل وخارج الميكروباص الخاص به دون عليها: اللي مش معاه فلوس يركب معايا متتحرجوش هي لله مش كل حاجة فلوس.
سائق ميكروباص يخصص سيارته لمساعدة المواطنين بالمجان
وقال سائق الميكروباص، خلال لقائه مع القاهرة 24، إنه قرر أن يطلق هذه المبادرة ويخصص سيارته لنقل المواطنين بالمجان، كصدقة جارية على روح شقيقته المتوفاة، وأيضا لرفع المعاناة على كاهل المواطنين، مؤكدا أنه يعمل سائق ميكروباص منذ نحو 15 عامًا، لذلك فهو مر بالعديد من المواقف خلال هذه السنوات استقرت في أذهانه، وجعلته يفكر في عمل شيء يقدمه للمواطنين ليساعدهم من خلاله.
وتابع سائق الميكروباص حديثه: أنا شغال بقالي 15 سنة في المواقف وعدت عليا حاجات كتير خلتني أفكر أعمل حاجة أساعد بيها الناس، سواء كانوا الناس دول معاهم فلوس أو مش معاهم، والموضوع ده خلاني أحس بتغيير في حياتي بالكامل من الناحية المادية والنفسية والمعنوية.
ولفت إلى أنه شعر بالندم عقب إطلاقه هذه المبادرة لأنه لم يفعل ذلك طوال السنوات الماضية، قائلا: حسيت بالندم إني معملتش الحاجة دي من زمان، من بعد ما عملت المبادرة دي وربنا معوض عليا بطريقة محدش يتخيلها.
وأوضح أنه قرر أن يخصص يوما في الأسبوع لنقل جميع المواطنين بالمجان سواء كانوا مقتدرين أو غير مقتدرين، مختتما: أنا شغال بالمبادرة طول الأسبوع وأي حد مش معاه فلوس مش بخليه يدفع حاجة، وهخلي يوم كمان لله مش هاخد فلوس من أي حد، وكمان لو حد عايز يطلع أي مشوار ومش معاه حقه هروح معاه مجانًا عشان الرزق كله مش فلوس.
