أحمد فهمي: كنت معجب ومشدود لقضية سفاح الجيزة.. واستعنت بطبيب نفسي خلال التحضير لها
تحدث الفنان أحمد فهمي، عن كواليس تحضيراته لـ مسلسل سفاح الجيزة، والذي من المقرر عرضه يوم 25 أغسطس الجاري، عبر منصة شاهد vip.
وقال أحمد فهمي، خلال حواره مع القاهرة 24: المسلسل فكرته مختلفة وعن أحداث حقيقية، ولما اتعرض عليا، الاتفاق مخدش أكتر من نص ساعة وكنت وافقت، لأني كنت متابع أصلا القضية الحقيقة وكنت معجب بيها وكانت شداني.
وتابع فهمي: لما بدأنا ندخل في الشخصية نفسها ونجمع عنها معلومات لقيتها غريبة جدًا، وبدأنا نسأل الناس اللي كانت حواليها، الكلام ده كله كان بيساعدنا على مستوى التأليف والإخراج والتمثيل، بدأنا نجمع الداتا عشان نوصل لشكل الشخصية.
وأكد فهمي، أن التحضيرات لشخصية سفاح الجيزة لم تكن سهلة بالمرة، وقال: الموضوع كان مرهق عشان أنا كممثل المطلوب مني إني أحب شخصية قاتل قاسي جدا، ومضطر أحبه عشان أنا اللي هلعبه، وبنبدأ نشوف إيه دوافعه لكل اللي عمله ده، فكان موضوع مجهد طبعا بس استمتعت بيه من أوله لأخره.
أحمد فهمي: استعنت بطبيب نفسي للتحضير لشخصية السفاح
ونسبةً لصعوبة أبعاد شخصية سفاح الجيزة، أشار أحمد فهمي إلى أنه لجأ إلى طبيب نفسي، لمساعدته على فهم الشخصية وخواصها، وقال: عملت كدة طبعا وكان في دكتور شغال معانا في المسلسل، وسألنا ناس عنه واتفرجت عليه.
وأضاف: مش فكرة إني هقلده لأن برضه أنا مش بجسد شخصية عامة، ومش هينفع أخده زي ما هو بظبط، لأن ده ممكن ميكونش مسلي للناس، إحنا بس بناخد روحه وشكله والصفات الرئيسية عنده، وبعدين نخلق الشخصية اللي عايزين نشتغل عليها.
