مدير مبيعات يحذر من “HSBC”: “البنك أجبرني على القرض لأنه محتاج العمولة” (صور)
حذر أحمد حلمي مدير مبيعات، من التعامل مع بنك HSBC بعد تجربة مريرة خاضها مع البنك خلال الساعات الأخيرة، قائلا: “ابعدوا عن قروض هذا البنك بيقولوا القرض هتاخده بعد خمس أيام ويخلصوه بعد شهر وتكون الحاجة اللي محتاجين القرض فيها خلصت”.
وأضاف حلمي: “بعد ما أخروا القرض اتصلت بهم لكي ألغي القرض إلا أن موظف اسمه محمد مهاب بفرع الهرم قالي كده القرض اتلغي لازم تأخذ القرض اليوم وتدفع القسط بكرة يا إما نعيد الورق كله، قولتله وقف كل حاجه ولما احتاج القرض ثاني ابقي أجي أعمل ورق جديد، وفجأة بعد يومين اتصل بي يقولي القرض نزل قولتله أعمل بيه إيه أنا قولتلك لما احتاجه هاجي البنك واعمل إجراءات جديدة”.
وتابع: “للأسف بقوله أنا مش محتاجه قالي ترجعه تدفع 5 % عشان نرجع الفلوس وبعد أن قدمت شكوتي على صفحة البنك على الفيس بوك تابع: “مدير المنطقة كلمني وقالي احنا عرفنا المشكلة وهنحلهالك واحنا آسفين، وللأسف كلام فقط وكلمت الكول سنتر قالولي هنحل الموضوع خلال 4 أيام عمل وعدى أسبوعين دون رد، الموظف اللي رشقني في القرض بعد مهاترات شهر كان مزنوق في عمولة القرض واعترف بغلطه أمام محمد عبد المنعم مدير فرع الهرم وأمام محمود مدير المنطقة ولم يحلوا الموضوع يبقى ده بنك تتعاملوا معاه”.
وتواصل “القاهرة 24” مع العميل أحمد حلمي والذي أكد أن البنك لم يحل مشكلته مما دفعة لاستلام المبلغ وإلا رده ودفع 5%، كما انه اضطر إلى سداد رسوم إداريه بقيمة 2500 قائلا: “بصراحه لو سوبر ماركت أو بقال مش هيعملوا كده”.
