محمد مرزبان عن مشاركته في سوق الكانتو: كان نفسي أشتغل مع حسين المنباوي.. وأتمنى تقديم دور شعبي
كشف الفنان محمد مرزبان، تفاصيل مشاركته في مسلسل سوق الكانتو، الذي عُرض في الموسم الرمضاني الماضي، وتعاونه مع المخرج حسين المنباوي.
وقال محمد مرزبان، في حواره بـ برنامج الستات مايعرفوش يكدبوا، المذاع عبر شاشة قناة CBC، عن مشاركته في مسلسل سوق الكانتو: كان نفسي اشتغل مع المخرج حسين المنباوي، وقابلته في مرة وقت ما كان بيصور فيلم مع أمير كرارة، وقولته إحنا مش هنشتغل مع بعض ولا إيه؟ أنا عايز أغير جلدي، وبعتلي دور الخواجة في مسلسل سوق الكانتو.
وتابع: أنا نفسي أعمل دور شعبي ابن بلد، لأن مش كل الشعبيين زي النماذج الخارجة اللي بتظهر في الأعمال، أنا كل يوم جمعة باخد الموتوسيكل بتاعي وبنزل أقف على عربية فول مع أصحابي، وأنا بحب ده وبحب أروح أكل في السيدة زينب.
وأضاف محمد مرزبان، متحدثًا عن أولى تجاربه التمثيلية، قائلًا: أول عمل ليا كان اسمه أرملة و4 بنات، معرفش حد يفتكره ولا لأ، وكان وقتها استوديوهات عارين في الزمالك، وكان مدير الإنتاج أستاذ محمد زعزع كان صاحب فضل عليا، واشتغلت فيه مع الأستاذ الراحل عمر الحريري.
محمد مرزبان: رفضت تقديم أحد الأدوار علشان أحافظ على سمعة بناتي
كما كشف محمد مرزبان، عن رفضه لأحد الأدوار بسبب قيمه الأخلاقية، قائلًا: رفضت زمان دور كان مهم جدًا ولكن مكنش ينفع أعمله لأنه مكنش من مبدأي إني أعمل كده، لأني أب لـ بنتين وكان لازم أحافظ على سمعتهم، وقولت مش هعمله حفاظًا على سمعة بناتي.. وقولت ليه أخلي يوم في الأيام يتقال لبناتي مش إنتي بنت فلان؟ لأن في ناس بتصدق الأدوار.
