صلينا قبل ما ننفذ الخطة.. ننشر أقوال المتهمين بخطف رجل الأعمال سمير ريان |تحقيقات
كشف المتهم السادس في واقعة خطف رجل الأعمال سمير ريان، ويعمل سائق ميكروباص، يدعى محمد ج ث، تفاصيل جديدة في الواقعة، واعترف بتدبير حيلة جهنمية لخطف وسرقة حوت السيارات سمير ريان.
اعترافات المتهم بخطف سمير ريان
وينشر القاهرة 24 نص التحقيقات في قضية خطف رجل الأعمال، سمير ريان، والتعدي عليه، في القضية التي حملت رقم 5203 لسنة 2023 جنح منشأة ناصر رقم حصر 372 لسنة 2023.
واقعة خطف سمير ريان
واستهل المتهم بخطف سمير ريان رجل الأعمال وحوت السيارات أقواله في التحقيقات بتوضيح خطة خطف سمير ريان قائلا: أنا ومراد “أحد المتهمين” كنا أصحاب من المدرسة بحكم أن إحنا قاعدين في دير مواس إحنا الاتنين، وأنا أعرف مراد من زمان وكنت اشتغلت فترة في معرض سيمر ريان اللي في العاشر، ومراد كان جه مرة اشترى عربية السانج يونج اللي ممسوك بيها وأنا عرفته على علي “أحد المتهمين”، وقولتله علي رجولة ولو احتجت حاجة وأنا مش موجود كلم علي، وخد رقم موبايل علي وبعدين أنا سبت الشغل في المعرض بتاع العاشر والقصة دي كانت من سنتين.
خطف وسرقة سمير ريان رجل الأعمال
وتابع المتهم بخطف رجل الأعمال سمير ريان: أنا سبت الشغل ونزلت البلد وكنت بكلم مراد كل فترة وقابلته في العيد، بعدين لقيته بيقولي إن هو وعلي أصحاب، ولقيت مراد من أسبوعين بس بيقولي أن علي قاله إن الحاج سمير بيحتكم على ملايين بحسب طبيعة شغله، وعلي قالي نسرقه ونعمل خميرة حلوة تريحنا من التعب والشقى اللي إحنا فيه، وبعدين قولتله طب ما ناكلها بالحلال وبلاش القصة دي، فقالي اسمع مني الفرصة دي مش هتتعوض وتعالى ليا بس كوتسيكا، عايز أتكلم معاك فقولتله ماشي قالي استنى مني تليفون لحد ما علي يشوف الدنيا كده ويظبطلنا الدنيا علشان نعرف هننفذ امتی.
وتابع: وبعدين كلمني وقالي تعالى كوتسيكا في المعادي، ركبت ميكروباص وجتله خبط على الباب ودخلت له قعدنا شوية وبعدين صلينا وقعدنا على الكورنيش شوية، وبروحنا غسل العربية وبعدين روحنا العتبة كان بيعمل أوض نوم للبلد عنده وبعدين رجعنا على كورنيش المعادي، وقالي أنا ظبطت الدنيا مع علي وهناخد الفلوس بكرة أو بعده بالكتير، والساعة كانت 8 بالليل تقريبا، قولتله ماشي وقالي معايا راشد وطاهر سعد، علي هيحكيلنا من جوة هو اللي هيعرفنا سمير ريان هيمشي امتى بالظبط، قولتله ماشي تمام فقالي أنت دورك أنك هتسوق العربية بس فقولتله ماشي.
التحقيقات في واقعة خطف سمير ريان
وتابع المتهم بخطف سمير ريان رجل الأعمال: وبعدين قالي أنا هجيب 2، وبيِّتّ معاه لتاني يوم وصحينا، هو نزل الورشة بتاعته وأنا كنت في الشقة عنده لحد الساعة 5 المغرب، وبعدين جالي كان خلص شغل وقالي تعالى ننزل نقعد على القهوة شوية جنب البيت عنده، وبعدين قالي احنا هنتحرك كمان نص ساعة والساعة كانت 8 ساعتها والعربية مكنتش لسة جت، وبعدين روحنا الأوتوستراد مشينا على رجلينا وبعدين شربنا قهوة على عربية في الشارع، كانت العربية الفان جت وكان سايقها طاهر، قالي سوق أنت العربية وخد الرجالة معاك علشان بتسوق كويس، ويلا علشان هننفذ دلوقتي قولتله ماشي واتحركنا بالعربية السوزوكي.
وتابع: وبعدين وقفنا بالعربية بعد كشك، ومراد كان على موتوسكيل ومستني على ناصية شارع المعرض عند الكشك، وبعدين اتصل على موبایل طاهر سعد، وطاهر فتح السماعة الخارجية وكنا سامعين مراد بيقول يلا، علي قالي إن سمير خرج بعربية نيسان قاشقاي لونها أزرق وأنا مستنيه يعديني، وهتحرك وراه وهبلغكم بكل حاجة وأنا معاكم مش هقفل، وبعدين قال لنا هيدخل من المقابر علي قالي أنه مروح بيته، وبعدين كنا سابقين أصلا بنتحرك من قبلها بس ماشيين براحة، وبعدين اتحركنا بسرعة روحنا استنيناه قبل طلعة كوبري جيهان السادات ومراد كان وراه على الموتوسيكل.
وتابع المتهم بخطف وسرقة رجل الأعمال سمير ريان: بعدين مراد قال لنا هو اللي وراكم ده بالعربية، أنا شوفت نور عربيته فقفلت عليه بالعرض، وبعدين طاهر سعد وطاهر ناجي وراشد حسنين نزلوا من العربية وأنا لفيت الناحية التانية من الطريق، وبعدين الرجالة نزلوا فتحوا باب عربيته من اليمين والشمال ولقيتهم بيضربوا فيه على الأرض ووقعوه ولقيته بيصرخ وفيه 3 عربيات جايين من بعيد، فلقيت مراد لف بالموتوسكيل ورجع عكس الطريق، وأنا خوفت وروحت متحرك لقيتهم جم ورايا وشحنوه على الكنبة اللي ورا، وكان راكب جنبه طاهر سعد وراشد حسنین وطاهر ناجي كان سايق،ولقيتهم جم ورايا بس أنا كملت على طول ناحية الأوتوستراد، بس قبل كوبري المنشية على طول ولقيت الحتة كانت زحمة وقافلة ساعتها تقريبا، كان في حادثة ساعتها وبعدين كملت علي، ومراد معرفش راح فين فجأة اختفى والعربية بتاعة الحاج سمير دخلت شمال وطلعوا على الأوتوستراد برضه بس كانوا ورايا بكتير، وبعدين مراد قابلني برا على الأوتوستراد والرجالة الطريق قفل عليهم وخلعوا.
واقعة خطف رجل الأعمال سمير ريان
وأقر المتهم بسرقة وخطف سمير ريان: وبعدين روحنا على الشقة عند مراد، وبعدها الرجالة جت وقعدنا على القهوة شوية فمراد قالهم ايه اللي حصل قالوا فيه عربية كانت ماشية ورانا شافت الموقف، وجريت ورانا وطاهر سعد نزل جري لوحده وطاهر ناجي وراشد حسنين جريوا مع بعض في نفس الاتجاه، وركبوا مواصلات وجم على بيت مراد، وبعدين كل واحد منهم راح سكنه، وانا نمت عند مراد والصبح رجعت على البلد وبعده بكام يوم جه ميكروباص نزل منه 5 لقيتهم قالولي ايه اللي حصل، وصوروني واحكيلنا اللي حصل وحكيت اللي حصل وخدوني لحد قسم المنشية، وبعدين دخلت القسم لقيت الرجالة كلهم موجودين.
