محمد محمود: عادل إمام الهرم الرابع لمصر.. ورفضت أدوار رغم احتياجاتي المالية
أعرب الفنان محمد محمود عن سعادته الشديدة لتعاونه مع الزعيم عادل إمام، كاشفًا الأسس التي يختار على أساسها أدواره في الأعمال الفنية.
وقال الفنان محمد محمود، خلال تصريحات خاصة لـ القاهرة 24: بقول للزعيم عادل إمام ربنا يخليك لينا ولمصر، وللعرب كلهم، أنت هرم رابع في مصر، والتاريخ بيقول كده، والناس كانت بتيجي من بره مصر وتنزل للقاهرة علشان تيجي مسرحياتك، وديه حاجة مش بتتعمل مع أي حد، عادل إمام قيمة وقامة، واللي بيسعدني أكتر إني بتكرم في دورة على اسم الزعيم عادل إمام.
وعن طريقة اختياره لأدواره، أضاف: أنا أبقى حابب الدور ومصدقه، ومش بعمله علشان الضحك، وممكن يجيلي مسلسل 30 حلقة وليا دور في الـ 30 حلقة، وعادتي بقرأ السكريبت كله، وأعرف علاقته بالأحداث، وكل التفاصيل دي بتخضع لحساباتي، وأنا اللي بختار الدور، لو دور 30 حلقة أرفضه، وأخد دور 6 حلقات.
وأردف محمد محمود قائلا: لو قست موضوع الأدوار ماديًا هاخد أضعاف أضعاف وأنا بعمل 5 حلقات، ولازم أصدق السيناريو، والدور، والشخصية، وكنت بعمل ده في عز ما أنا محتاج أشتغل، وممكن أرفض عمل كامل مش هيضفلي حاجه.
محمد محمود: ربنا إداني حاجات أفضل من الشهرة
وتحدث الفنان محمد محمود عن مشواره المسرحي، قائلا: أجيالنا كلها اتظلمت في المسرح، وفي ناس أفضل مني بكتير، وفي أحسن مني ومش عارفين يشتغلوا، زي ما أنا عمري ما روحت لحد وقولت عايز أشتغل، وربنا كان مديني حاجات أحسن بكتير من الشهرة، والمسرحيات لو اتصورت واتذاعت مكنش هيحصل اللي حصلنا ده.
