مدحت العدل: انسحبنا من سوق السينما لأن أصحاب دور العرض هم المنتجون
كشف السيناريست مدحت العدل، سبب انسحاب شركة العدل جروب من سوق السينما، مشيرًا إلى أن حالة السينما المصرية حاليًا لم تحدث من قبل.
وقال مدحت العدل، خلال ندوته في القاهرة 24: اللي بيحصل في السينما المصرية هي حالة محصلتش في الدنيا كلها، وللأسف اللي بينتج هو صاحب دور العرض وهو اللي بيوزع، وإحنا انسحبنا من سوق السينما لأن أصحاب دور العرض هم المنتجين.
مدحت العدل يتحدث عن فيلم ع الزيرو
كما تحدث مدحت العدل، عن فيلمه الذي يعرض حاليًا في السينمات للفنان محمد رمضان، وهو فيلم ع الزيرو، وقال: كان نفسي أقدم فيلم ع الزيرو في قالب إنساني، ومحمد رمضان قريب من الناس كلها، ولما يقول أي حاجة هو مؤثر أكتر من أي حد.
وأضاف: عايز تعمل حملة للشباب هات محمد رمضان، وفيلم ع الزيرو كان اسمه بطل عادي والبطل العادي هو الجمهور، عشان هو شبه كل الناس، واللي قرر يسميه ع الزيرو هو محمد رمضان، لأني كنت بحكيله أغنية ع الزيرو قالي ما تيجي نسمي الفيلم ع الزيرو، فعجبني الاسم وهو تجاري أكتر، والفيلم بيتكلم عن تجارة الأعضاء في العالم كله، في كل دول العالم، وهي تجارة رائجة.
فيلم ع الزيرو
يعرض حاليًا في السينمات فيلم ع الزيرو، بطولة الفنان محمد رمضان، والعديد من الفنانين، أبرزهم الفنانة نيللي كريم، إسلام إبراهيم، الطفل منذر مهران، جومانا مراد، وآخرين، والعمل من تأليف مدحت العدل، وإخراج ماندو العدل، وإنتاج العدل جروب.
