مصطفى كامل: حلمي عبد الباقي مثال مشرف للفن.. والانتخابات الإلكترونية منعت أي تزوير
حرص الفنان مصطفى كامل نقيب المهن الموسيقية، على تهنئة صديقه الفنان حلمي عبد الباقي، بعد فوزه باكتساح في انتخابات مجلس إدارة نقابة المهن الموسيقية، بجانب حديثه عن الانتخابات الإلكترونية.
وقال مصطفى كامل في لقائه مع القاهرة 24: حلمي عبد الباقي أخويا وصاحب عمري ومثال مشرف لمهنة الفن عمومًا، وعلى مستوى النقابة حلمي عبد الباقي قدم كتير أوي، وربنا هيجازيه أكتر من اللي حصل في النتيجة، هيجازيه في ولاده خير لأنه راجل فاهم يعني إيه خير ويعني إيه إنسان ويعني إيه مريض ومحتاج وزميل.
وتابع: اللي مكسبوش بقول ليهم هارد لاك، وكلهم إخواتنا وزملائنا وكانت عملية انتخابية بمنتهى الشرف والأمانة، وسيبنا كل الناس تقول كلمتها وتطلع رأيها بدون أي ضغوط وبدون تزوير، والحمد لله رب العالمين وربنا يوفقهم واللي مالوش نصيب إن شاء الله يكون ليه في الدورات اللي جاية والتجديد النصفي، لأن أنا كل حاجة همشيها قانوني بأمر الله، وإحنا سنتين وهنعمل تجديد نصفي.
مصطفى كامل: مفيش رقيب على الانتخابات الورقية
أما عن نظام الانتخاب الإلكتروني، فعلق مصطفى كامل قائلًا: إحنا كنا مخيرين إما أن تدار الانتخابات الورقية والانتخابات الورقية بيكون فيها مشاكل دائمًا، لأن معندناش في النقابة لا ضابط ولا رابط عليها، بمعنى إن الورق والاستمارات بتاعة إبداء الرأي بتكون مطبوعة من داخل النقابة، لو أنت عندك النية للتزييف والتزوير هيتم وهيحصل.
واختتم حديثه: الانتخابات الإلكترونية أولًا هيئة قضائية في منتهى الشرف والنزاهة، وتاني حاجة الموضوع بيتجمع كما لو كان آلة حاسبة بتلم الأصوات من كل دول، ولا في فرز ولا ورق ملعوب فيه، وكان اختياري طبعًا إلكترونية لأني قولت هديرها بمنتهى الشرف والنزاهة.
