هاني محروس عن مشاركة حمدي بتشان في غناء سطلانة: اشمعنا عبد الباسط حمودة يشتغل وهو لأ
كشف المنتج هاني محروس، سبب اختياره للمطرب حمدي بتشان للمشاركة في أغنية سطلانة، التي حققت نجاحا كبيرا الفترة الماضية.
وقال هاني محروس في تصريح خاص لـ القاهرة 24: أنا اللي طلبت عم حمدي بتشان يشارك في الأغنية، أنا بحب الراجل ده وهو من جيل عبد الباسط حمودة، اشمعنا ده يفضل شغال وعم حمدي ميشتغلش؟ دي حاجة مترضيش ربنا.
وتابع: أنا متواصلتش مع حد بعد الأغنية، وهما مش عارفين عنها حاجة لأنهم محضروش أي حاجة، الناس دي جت نفذوا اللي أنا عايزه، ولكن في منتج وملحن وشاعر المفروض يتقدروا ويتقال أساميهم.
وأضاف: الأغنية دي لو أنا شايف أنها عادية مكنتش أنا كهاني محروس هطلع أقول إنها أغنية الصيف، أنا ربنا أعطاني موهبة وبعرف استخدمها باحترافية.
واستكمل هاني محروس: حسن الخلعي مكنش موجود في الأغنية وأنا حطيته تقديرًا لكريم السبكي ووالده، وكتبنا له الكوبليه بتاعه جوا الاستوديو، ودول مش صناع أغنية سطلانة دول مؤدين الأغنية.
أغنية سطلانة
وحققت أغنية سطلانة نجاحا كبيرا لدى الجمهور، وذلك بعد احتفال لاعبي الأهلي على أنغامها بفوزهم بدوري أبطال إفريقيا، وهي الأغنية الدعائية لفيلم بعد الشر الذي طرح في موسم أفلام عيد الفطر 2023، من بطولة علي ربيع، وشارك في غنائها عبد الباسط حمودة وحمدي بتشان وحسن الخلعي.
