بعد تراجعه عن الاعتزال.. خالد الفايد: مش أي حد يربي دقنه يبقى شيخ ومش عيب أعتذر
كشف خالد الفايد نجم برنامج ذا فويس كيدز تفاصيل الفترة الماضية من حياته، أثناء فترة اعتزاله وابتعاده عن مجال الغناء، مشيرًا إلى أنها كانت أيام سوداء في حياته.
تفاصيل تراجع خالد الفايد عن قرار الاعتزال
وقال خالد الفايد خلال تصريحات خاصة لـ القاهرة 24: مش أي حد يربي دقنه أو بيحفظ أو يدي درس في الدين يبقى شيخ، فيه مرجع إسلامي لينا وهو الأزهر ده اللي نرجعله ديمًا ونروحله على طول، الباقي مُدعين، ومعظمهم باحثين وقارئين مش أكتر، واتعلمت إني اعمل اللي بحبه وأسيبني من الناس.
وعن خطته خلال الفترة المقبلة، أردف خالد فايد: مركز دلوقتي لو اتصالحت مع أستاذ هاني محروس أركز في شغلي وحياتي والتزم وأصلي، ولو مقبلش بالصلح واعتذاري من حقه، كفاية إني خرجت من الفكر اللي كنت فيه.
وأضاف خالد: عايز أقول إني لما بطلت كنت مخلص جدًا ولا كان في نيتي أي تريند والموضوع طلع لوحده تريند أول مرة ومش بسعى له ودي حاجة بتاعت ربنا ودلوقتي لما سألت وعرفت والناس كويسة دلتني على الصح، تفكيري بيتغير، الواحد كل فترة تفكيره بيتغير.
وتابع خالد الفايد: عايز أقول إن الاعتذار مش غلط ومش عيب، الواحد كان فاهم حاجات غلط ومر بفترة محدش مر بيها غيره وطبيعي الناس متفهمش وتشوف الظاهر من بره وإنه واحد كان ملتزم ورجع، مفيهوش إدانة لأي حد وكل الناس بتعمل اللي بتحبه.
