عمر الشناوي عن علاقته بابن زوجته: تفاجأت باندهاش الناس.. والوضع اللي وصلنا له مؤسف
تحدث الفنان عمر الشناوي عن رد فعله، بعد إشادات مستخدمي مواقع التواصل الاجتماعي بحديثه عن ابن زوجته من الفنان محمد كيلاني، مشيرًا إلى أنه ىندهش من استغراب البعض من علاقته بابن زوجته.
وقال عمر الشناوي لـ القاهرة 24: فرحت وزعلت في نفس الوقت، وانبسطت من أن الناس اتكلمت عن الموضوع، وزعلت أن حاجة طبيعية وبديهية الناس تستغربها، وحاجة مؤسفة وفي ناس بعتوا لي كومنتات من نوعية شوفوا الرجالة بتعمل أيه بدال ما تمرمطوا البنات في المحاكم واستغربت من الحال اللي بقينا فيه، وأنا مش بدعي الفضيلة وفي ناس أحسن مني بكتير.
وأضاف عمر الشناوي: الناس شايفة أنها حاجة كبيرة وهي حاجة عادية وإحنا مسؤولين لما يكون فيه أطفال لما يكبروا يكونوا عاقلين وأسوياء ونربي ناس تطور وتبني مش تهدم، وده اللي حسسني بحزن لما قرأت الكومنتات، فليه واحد متجوز واحدة يقول لها مش هربي عيال غيري، يعني لو واحدة مطلقة ترمي ابنها في الشارع ولا تربيه تربية سوية وعنده حنية كاملة من أمه مش مجزءة.
وكان الفنان عمر الشناوي كشف تفاصيل علاقته بابن زوجته من الفنان محمد الكيلاني، في لقاء له مع برنامج الستات ما يعرفوش يكدبوا، مؤكدًا أنه يعتبره مثل ابنه ويعتبر والده الفنان محمد كيلاني مثل أخيه.
وأشار عمر الشناوي إلى أن ابن زوجته يعيش معها طيلة الأسبوع باستثناء يومي الإجازة في نهاية الأسبوع يذهب لوالده، مضيفًا: عندي حسن عمره 4 سنين وحمزة ابن مراتي عمره 10 سنين، وعايشين مع بعض ست سنين وهو شخصيته ذكية خارق مش طبيعي مخه أكبر من سنه بكتير دايما بيطلعني غلطان لما نتناقش في سؤال علمي ويقول لي غلط ولما نعمل سيرش يطلع هو اللي صح.
واستكمل عمر الشناوي: محمد كيلاني ما بقاش صديقي لأن ولادنا إخوة علشان كده بعتبره أخويا، ولو ماكنش فيه أطفال كان هيكون طليق مراتي.
