نورهان منصور: أكتر حاجة بتواجه الستات تأييد الحرية.. وأهلي عمرهم ما تدخلوا في قراراتي
حلت الفنانة نورهان منصور ضيفة على أحد البرامج الحوارية، وتحدثت خلال الحوار عن تفاصيل علاقتها بشقيقتها التوأم الفنانة رانيا منصور، وحياتها الشخصية.
ونرصد لكم أبرز تصريحات نورهان منصور التليفزيونية:
- أنا درست مسرح بس كنت حابة اشتغل ورا الكاميرا، لكن رانيا أختي من البداية هي اللي كانت محددة إنها عايزة تمثل، ولكن أنا وهي عملنا مع بعض مسلسل نصيبي وقسمتك، ونقدر نقول إن رانيا هي اللي ساعدتني.
- نصيبي وقسمتك كانت رانيا بتقوم بدور الأخت والممثلة التانية اعتذرت على آخر لحظة، والمخرج قال طالما رانيا ليها أخت توأم ما نطلعهم توأم وأنا أعمل الدور، وملحقتش أحضر خالص للشخصية وكان تحدي صعب أوي، لأنهم اتفقوا معايا على الدور قبل التصوير بيومين، ولكني اتبسطت جدًا بالتجربة وردود الأفعال عليها.
- علاقتي بـ رانيا جميلة وإحنا أصحاب وفي مواقف كوميدية كتير بنتعرض ليها بسبب الشبه، وأنا بعتبرها صديقتي المفضلة.
- أكتر حاجة بتواجه الستات تأييد الحرية، زي إن بنت أهلها يمنعوها من تحقيق حلمها وممكن جوزها أو أخوها يمنعوها.
- اتعرضت لمواقف كان فيها إجبار وتسلط وتحكم وغيرة وانتقاد ولوم ولكن مش من أهلي.
- دور أهلي في الدعم قوي جدًا، ودايمًا كنت بشوف في حياة أصحابي كتير أهلهم كانوا بيتحكموا في اختياراتهم، ولكن أهلي مش كده خالص وعمرهم ما اتدخلوا في اختياراتي أنا وأختي، حتى في الاختيارات المصيرية وده خلاني على مستوى كبير جدًا من المسئولية.
- ضربت واحد اتحرش بيا قبل كده، ورد فعلي وقتها كان تلقائي بصراحة.
- أهم حاجة في حياتي إني أكون على اتصال قوي بـ ربنا وده بيفرق معايا جدًا بيحققلي نشوى كبيرة وبحس بدعمه ليا أوي، ولما بقصر برجع بشوق كبير أوي.
- مش عارفة ليه الناس واخدة فكرة عني على السوشيال ميديا إني بنت بحب الفاشون واللايف ستايل والسفر، ولكن أنا بحب السفر والدراسة والقراءة جدًا، أنا ملتزمة ومنظمة أوي بزيادة.
