علي الحجار: أغنية الزين والزينة من التراث الليبي.. والتنقيب عن المواهب مهم زي تصرف بليغ حمدي معايا
كشف الفنان علي الحجار، كواليس أغنيته الشهيرة الزين والزينة، كما أكد على أهمية التنقيب على المواهب بشكل كبير.
وقال علي الحجار خلال حواره مع القاهرة 24 على هامش حفله بالجامعة الأمريكية، الذي أحياه منذ أيام قليلة: أغنية الزين والزينة سمعهالي حميد الشاعري وسط 8 ألحان تانيين، ولقيت دي شكلها تنفع أغنية فرح، هو سمعني لحنها بس بكلام تاني.
وأردف علي الحجار قائلا: وهي من التراث الليبي، قولتله لو موافق توزعها مزيكا اديهالي، وخدتها اديتها لشاعر وعملها فعلا أغنية فرح حلوة ومختلفة، لكن بالنسبة توقعي لنجاحها وهتقعد كام سنة كنت معرفوش.
وأضاف علي الحجار، مشيرًا إلى أهمية التنقيب عن المواهب، قائلًا: التنقيب على المواهب مهم جدا وبليغ حمدي عمل معايا كدة وقعد يدور لغاية ما جابني، البلد ليه بتجري في حتت تانية وسايبة المواهب الكبيرة دي، وأنا كتبت من 7 سنين على صفحتي اللي شايف في نفسه موهبة الغناء أو العزف أو الشعر يبعتلنا وجالي نحو 2000 رسالة واخترت منهم الحلوين لأني لو قدمت حد نص نص الناس مش هتحترمني والناس عارفة إني مش هقدم واحد ضعيف.
علي الحجار: فرحان إن جمهوري سمّيع وبيفهم
واستكمل علي الحجار حديثه، مشيرًا إلى سعادته بجمهوره الذي يفهم، وقال: أنا في العموم فرحان إني جمهوري سميع وبيفهم ودول بالنسابي ثروة كبيرة جدا لأن برغم إني بغني أغاني صعبة، الجمهور بيفهمها، فـ اللي بحب الأغنية بيستوعبها برضه، كمان تترات المسلسلات معظمهم فيهم كلام صعب زي كلمات سيد حجاب والأبنودي، فـ إن الجمهور ده يسمعني ده فخر كبير.
