رامي صبري لـ عمرو مصطفى: لو عندي مشاكل نفسية مش هخليك تشتغل تاني بالقانون
علق الفنان رامي صبري على اتهام الفنان عمرو مصطفى، بسرقة رامي صبري لحن أغنيته يمكن خير من أغنية رقصة، مشيرًا إلى أن سرقة الألحان تكون عندما يتم اقتباس 4 موازير فقط، بينما تتشابه بدايات الأغنيتين في ثلاثة موازير فقط.
وقال رامي صبري في تصريحات لبرنامج "أجمد 7 الساعة 7” مع المذيعة جيهان عبد الله عبر إذاعة "نجوم إف إم": نفسي عمرو مصطفى كصديق وعشرة سنين، يركز بجد هو فنان بجد فنان بجد مش أي كلام وموهوب، وعمل أغاني مهمة في مسيرته الفنية لعمرو دياب وحماقي وناس كتير نجحوا، وهو نجح عشان اشتغل مع عمرو وفنانين كبار، حتى لو المرحلة دي عدت متقعدش تخبط في الناس كلها ومتتخانقش وتعمل عداوات مع الناس كلها وتزعل الناس، ومش هنتبسط منك احنا هنتضايق منك؛ لأني مبحبش التقليل من قيمة الناس.
رامي صبري لـ عمرو مصطفى: لما بيغير من نجاح بيطلع يخبط في الناس
وأضاف رامي صبري:مش بحب أتكلم على زملاء بشكل سلبي والمفروض إننا أصحاب وعشان بيني وبينه عشرة مش هتكلم بطريقته؛ لأن طريقته معجبتنيش لأنه قال إن أنا سرقت، الكلام اللي قاله عمرو مصطفى يدينه، يعني إيه السرقة دي أصلا عيب إنه يطلع يقول على فنان كبير في هذا الوسط يتكلم عنه بالشكل ده، مشكلة عمرو مصطفى مش أغاني لأن لو حد فينا سرق حاجة هيقضاينا، عمرو مصطفى لما بيغير من نجاح بيطلع يخبط في الناس.
وتابع رامي صبري: محدش فينا عاجبه خالص كلنا واقعين وكلنا مبنعملش أغاني حلوة وكلنا أغانينا مسروقة منه، وأنا لو عندي مشاكل نفسية ممكن مخليهوش يشتغل تاني بالقانون، إنما عشان أنا مهذب ومتربي كويس هعديها؛ لأن مراته ست محترمة وولاده زي أولادي.
