عصام كاريكا: خليت ممثلين يغنوا ولما بيطلعوا في التلفزيون بينكروا.. ونفسي اشتغل مع أنغام
كشف المطرب والملحن عصام كاريكا، تفاصيل تعاونه مع عدد من الممثلين في أغاني أفلامهم، مؤكدًا أن هذه الأغاني كانت بسبب في نجاح الأفلام، ولكن منهم من ينكر مجهوده في صناعة هذه الأغاني، كما أعرب عن رغبته في التعاون مع الفنانة أنغام.
وقال عصام كاريكا في لقائه ببرنامج مساء DMC: في ممثلين أنا خليتهم يغنوا والناس تحب الأغنية بصوتهم، وصوتهم مكنش كويس، والأغاني نجحت واللحن الحلو ممكن يغطي على الصوت، دي مهنتي وأنا اللي بطلع الغنوة حلوة، الممثل بيغني ومش مطلوب منه يكون أم كلثوم، علشان كده أنا تعبت مع ممثلين كتير، وبعد لما الأغاني بتنجح بتكون سبب في نجاح الأفلام، ولما بيجوا في التلفزيون والمذيعين بيقولوا أغانيك بتنجح المفروض أنه يقول أن أنا اللي عملت ده ولكنهم بينكروا، وبعد كده مبنشتغلش مع بعض تاني، النجاح بتاع ربنا ثم الراجل اللي تعب.
وتابع: حمادة هلال بيطلع في أي مكان وبيقول اللي وقف معايا وقدمني للناس عصام كاريكا، وأحمد سعد ومجدي القاسم وحكيم ومحمد محيي كنا مجموعة اشتغلنا بحب أن كله يوصل وينجح، وفي ناس بتشيل الجميل وناس بتنكره ولما تيجي سيرتي بتعديها كده.. ومحمد هنيدي إداني قيمتي وطلع مع أستاذ إسعاد يونس وقال عصام كاريكا وقف معايا وعملي ألحان.
كما كشف عصام كاريكا عن تلحينه أشهر أغاني الأفلام، قائلًا: أغنية محمد هنيدي ودنيا سمير غانم في فيلم يانا يا خالتي كانت بتاعتي ونازلة في ألبومي وبعدين سمعها محمد وقالي هاخدها في الفيلم وقولتله يلا وشيلتها من الألبوم وإديتهاله، وأغنية باللي نسيت الغرام بتاعة محمد سعد في فيلم بوحة كانت بتاعتي، وعملت أغاني اللمبي واللي بالي بالك و55 إسعاف ولينا تاريخ مع بعض، وأنا بتعامل كملحن مش مطرب، وأنا عارف ده ومبضحكش على نفسي.
عصام كاريكا: لو اشتغلت مع أنغام هنعمل حاجة تعيش 30 سنة
وأعرب عصام كاريكا عن رغبته في التعاون مع الفنانة أنغام، قائلًا: أنا نفسي اشتغل لـ أنغام ولو عملنا حاجة هتفضل 30 سنة عايشة، وأنا اللي ناقصني أنغام، لأني اشتغلت مع فنانات كتير زي شيرين ونوال الزغبي وديانا حداد.
واستكمل: أنا عملت لعمرو دياب أغنية وهي عاملة إيه، ولـ محمد منير أغنية عمر عيني، ولهاني شاكر أنا اسمي على الوقت، وديانا حداد أغنية امشي ورا كذبهم، ومحمد محي أغنية أعاتبك على إيه، ومصطفى كامل أغنية افتكرلي، وبهاء سلطان أغنية 3 دقائق، وحكيم أغنية بيني وبينك، ولطيفة أغنية بحر الغرام، وصابر الرباعي، وحمادة هلال أول أغنية نجحت له كانت من ألحاني.
عصام كاريكا يتعاون مع الكينج محمد منير في أغنية أنا الذي
وكشف عصام كاريكا، عن تعاون جديد يجمعه بالكينج محمد منير، موضحًا: في أغاني مينفعش يغنيها غير محمد منير، واشتغلت معاه في أغنية عمر عيني وكانت من كلمات النقيب مصطفى كامل، وأنا قابلته من شهر كنا بنغني سوا في حفلة كبيرة في العريش وقعدنا في السويت بتاعه واختار أغنية جديدة اسمها أنا الذي، وداخلين نسجلها كمان يومين.
