في نجوم كتير مش ممثلين وكان في اضطراب بيني وبين محمد رمضان.. أبرز تصريحات لبنى ونس
حلت الفنانة لبنى ونس ضيفة على الإعلامية شافكي المنير في برنامجها التاسعة، الذي تقدمه عبر شاشة قناة الأولى المصرية، وتحدثت خلال اللقاء عن مشوارها الفني ونجاحها في مسلسل جعفر العمدة، الذي عرض في الموسم الرمضاني 2023 وحقق نجاحا كبيرا.
ونرصد لكم أبرز تصريحات لبنى ونس في برنامج التاسعة:
- لما رجعت لـ الفن وجدت تغيير في الوسط الفني 180 درجة، وهنا كانت الصدمة هواكب إيه ولا إيه أنا اتربيت في الأبيض والأسود.
- كواليس جعفر العمدة كانت عاملة زي الكتيبة والخلية، وكل واحد كان عارف هو بيعمل إيه وده اللي خلق جزء كبير من نجاح العمل، وكان في رب للعمل اللي هو المخرج محمد سامي ومفيش حد فوق حد ومفيش حاجة اسمها نجم وأقل منه.
- أنا كان في أحاسيس مضطربة جدًا بيني وبين محمد رمضان كنت عايزاه يختفي لأني خايفة منه طول مسلسل جعفر العمدة، وكانت مشاعر قلق طول الوقت من بعد ما أسلم عليه كنت باخد مشاعر الشخصية.
- كان في كيمياء بيني وبين أحمد داش ومكنش عندي شك أي لحظة أنه مش ابني، وهو كان عنده نفس الإحساس وكنا في الحالة ومش عايزين نخرج منها.
- محمد سامي هو اللي مرشحني وقالي إن الدور ده عصب الرواية وده الأساس، والشخصية مش بس أم خايفة تفقد ابنها اللي ربته هي من البداية زي أي سيدة في المجتمع اتطلقت مرتين علشان مبتخلفش، يعني عندها حالة نفسية سيئة جدًا.
- مشاعر الأم على الشاشة مش سهلة خالص والشخصية الناس تعاطفت معاها علشان صدقوها وحبها للولد وتمسكها بيه، وفي نفس الوقت كنت بذاكر ملاحظات محمد سامي أن الشخصية طيبة جدًا.
- التمثيل مهنة وموهبة من ربنا، وفكرة أن الفنان والنجم بحسها للتريند زي ما بيقولوا، وفي كتير جدًا من النجوم مع احترامي ليهم مش ممثلين.
- محمد سامي فاجئني زي الجمهور أنه بدل ما يعمل ميك آب أو يجبلي دوبلير جاب برنامج بيستخدموه في هوليوود يصغرني، برافو عليه أنا اتفاجئت.
- حسيت إني مش هعرف أوفق بين البيت والأولاد والفن، واختارت إني أرجع تاني الفن لما أولادي يكبروا، وبعد ما كبروا رجعت.
