تامر عاشور: كسبت فلوس في الغناء أكثر من التلحين.. وتسريب الأغاني سبب شهرتي
كشف المطرب تامر عاشور، أنه حصل على عائد مادي من الغناء أكبر من العائد المادي الخاص بتلحين الأغاني، بجانب حديثه عن أغاني المهرجانات الشعبية والتي أشار إلى أنه لن يقدمها في حياته.
وقال تامر عاشور في تصريحات تلفزيونية: كسبت فلوس أكثر كمطرب من التلحين والوظيفتين مختلفتين عن بعض، وكل واحدة من الوظيفتين ليها أجر مختلف وفلوس التلحين قوية ولكن الغناء أكثر، وأنا بلحن من زمان وعمري ما كنت بفكر في الموضوع المادي، وعملت حفلات وطبيعي يكون أجرك كمطرب أكبر وأعلى.
وأوضح تامر عاشور: أنا كنت بلحن وبغني في نفس الوقت وفي أغاني اتسربت ليا ونجحت وبعدها علطول وقعت مع شركة إنتاج وبعدين عملت ألبومات، ومخدتش في التلحين إلا سنتين أو ثلاثة ومعرفش مين كان بيسرب الأغاني ولكنه خدمني وبقيت مشهور وعملت سيط وأول أغنية اتسربت كانت ذكريات كدابة.
تامر عاشور: مستحيل أغني مهرجانات واتسرق مني أغاني واتحولت لمهرجانات
وعن رأيه في أغاني المهرجانات الشعبية، فعلق تامر عاشور: لا يمكن أغني مهرجانات مستحيل وهو مش لون فني ولكن هو تقليعه، والسوق مستوعب أن المهرجانات تنجح دي حاجات تخص السوق.
وأضاف تامر عاشور: في مهرجانات ناجحة وده شيء كويس ولكن في النهاية دي تقليعه، مش هنيجي مثلا بعد 10 سنين نلاقي مهرجانات مستمرة.. ليا أغاني اتعمل منها مهرجانات وتم تغيير كلمات الأغاني.. وبحب اسمع من المطربين الشعبيين حكيم والليثي وعبد الباسط وأحمد شيبة وحسن الأسمر.
