جبت آخري منه.. اعترافات المتهم بإشعال النيران في والده بطنطا |خاص
حصل القاهرة 24، على اعترافات المتهم بقتل والده بطنطا بعد أن عقد العزم والنية على قتله حتى يستولي على الكشك، وأعد لهذا الغرض أداة معجلة للاشتعال -زجاجة جازولين- وتوجه إلى المكان الذي أيقن وجود والده فيه، وما أن ظفر به حتى أضرم النيران فيه، بعد أن سكب عليه البنزين قاصدا من ذلك إزهاق روحه، فأحدث به الإصابات الموصوفة بتقرير الصفة التشريحية التي أودت بحياته.
اعترافات المتهم بقتل والده حرقًا
وجاءت اعترافات المتهم بقتل والده حرقًا: اللي حصل إني لقيت أبويا هناك وقاعد جوا الكرفان، ومولع في شوية زبالة جمب الباب بتاع الكرفان، فدخلت لأبويا وبقوله يابا أنت ليه كرشت الولا فلقيته، رد عليا وقالي أنت مالك، هو أنت ليك حاجة هنا؟، وقام عايز يضربني وهو بيقوم الكرفان واقف على 4 قوالب طوب، ومن النص بيكون خفيف لأنه مش تحتيه حاجة، فالكرفان اتهز بينا حاجة بسيطة، وأنا حاطط في الكرفان قزازة بنزين بلاستيك اتنين لتر بولع بيها في الزبالة وبطهر بيها المكان علشان فيه ريحة وحشة كانت بالمكان، والناس قالت لي إن الريحة دي مبتروحش غير بالبنزين، وأنا كنت متعصب وجايب آخري منه، والقزازة دي وقعت والبنزين اللي فيها اتسرب لحد ما وصل لكوم الزبالة اللي كان أبويا مولع فيه جمب الكرفان، فجأة لقينا الكرفان وأنا كنت واقف علي الباب فجريت وطلعت من الكرفان، ولقيت أبويا طلع هو كمان بسرعة بس الجلابية بتاعته كان مسك فيها النار فهو حاول يقلعها والناس اتملت حواليه وطفوه.
وأضاف المتهم بقتل والده حرقا بطنطا: أنا أول ما لقيت أنهم طفوه خوفت منه ومن الناس ومن الحكومةـ وطبعا مراتي بتولد وأنا سايبها في البيت وممكن يحصلها حاجة، فجريت علي البيت وقولت لمراتي على اللي حصل، وهي خافت من أمي وأخويا لييجوا يعملو حاجة ويقولو إنها السبب، وقالت لي وديني عند أهلي وهي من حلوان في القاهرة، فأنا ركبتها عربية القاهرة، وكنت هروح وراهم لقيت رئيس المباحث كلمني في التلفون وقالي تعاله عايزينك قولت له قدامي ساعة واجيلك فقام رد الظابط وقالي لا ده أنا الدنيا مقلوبة عليا، فلما سمعت الدنيا مقلوبة عليا دي خوفت أكثر إذا كان الدنيا مقلوبة على الضابط أمال بقا هيتبقي شكلها إيه عليا، وجيت قافل التلفون ورايح على حلوان لمراتي عشان هتولد، ولما وصلت القاهرة، عرفت أن مراتي في المستشفى وروحت على هناك، وبعدين وأنا كنت واقف قدام المستشفى الفجر لقيت واحد جاي وبيقولي إزيك يا حمدي وقام مكلبشني وقالي تعالى معانا وأخدوني ركبوني مكروباص وجابوني على قسم تاني وبعدين جيت على هنا.
ومن المقرر أن تنظر محكمة جنايات طنطا غدا الأحد جلسة محاكمة المتهم حمدي سامح؛ لاتهامه بإشعال النيران في والده والتسبب في وفاته، إثر خلاف سابق بينهما على إدارة الكشك الخاص بالأسرة.
