ياسمين عز تعلق على حفل زفاف ولي عهد الأردن: نفسي بناتنا يتعلموا التقدير من الملوك والأميرات
علقت الإعلامية ياسمين عز على حفل زفاف ولي عهد الأردن، مؤكدة أن محبة عائلة الزوج من محبة الزوج لأن الحياة ليست حربًا.
وقالت ياسمين عز في برنامجها كلام الناس عبر شاشة إم بي سي مصر: كلنا شوفنا حفل زفاف ولي عهد الأردن، وشوفنا إخوات العريس نسيوا الألقاب ووقفوا يعدلوا الفستان لـ زوجة ولي العهد، ونفسي بناتنا يستوعبوا الدرس ويتعلموا التقدير من الملوك والأميرات لأن الحياة مش حرب ومحبتك لـ زوجك من محبتك لأهله.
وواصلت ياسمين عز: فيه بنات عندنا بيمنعوا قرايب العريس من حضور حفل والزفاف، وبقولهم ليه بتعملوا كدا؟ محدش هيخطفه منك لأنه جالك أنتي والحياة مش حرب.
كما وجهت ياسمين عز عددًا من النصائح للسيدات، قائلة: لو شوفتي بالصدفة زوج أختك مع واحدة تانية أوعي تقولي لها وتخربي بيتها، لأن يمكن بيعمل خير وبيساعد واحدة نظرها ضعيف وبيوصلها، ويمكن هي شافت نفس الموقف عمله زوجك لكن كتمت الموضوع خوفًا على مشاعرك.
وسبق وقالت ياسمين عز في تصريحات سابقة ببرنامجها كلام الناس: هفضل أقول كل اللي مؤمنة به ومقتنعة بيه وهو إن مفيش كرامة بين الزوج والزوجة وأول الزواج تحطوا الكرامة في الدرج، وهفضل أتكلم في الأصول واللي اتربينا عليه، لكن مع الأسف دلوقتي بيقولوا عليها موضة قديمة، وبرنامجي بيتكلم عن الحق والأصول وربنا شاهد على كلامي وهيحاسبني لو وقعت واحدة في مشكلة مع زوجها.
