وفاء عامر تبكي خلال لقائها بكلام الناس: بزعل لما أحس إن جوزي مش شايفني |فيديو
بكت الفنانة وفاء عامر خلال حديثها عن زوجها في لقائها ببرنامج كلام الناس مع الإعلامية ياسمين عز عبر شاشة إم بي سي مصر، مشيرة إلى أنها تحزن عندما تشعر أن زوجها لم يشتَق لها.
وقالت وفاء عامر: بزعل لما جوزي يتأخر عليا وما أوحشهوش أو أحس إنه مش شايفني، ولما يبطل يشوفني، لإن الراجل لما يشوف مراته طول الوقت، وكأن مفيش غيرها وبيكون عاوز يبسطها ويقول لها كلمة حلوة بيفرق معاها، لإنك لو وزنتي كنوز العالم قصاد الكلمة الحلوة، الكلمة الحلوة ترجح، ولما يقول لها وحشيتني وهو لسه نازل من البيت، وأنا بحب أي علاقة حلوة بين اتنين، علشان كده بارقي أي اتنين بيحبوا بعض وبنصحهم علشان ما يتحسدوش لإني بخاف على العلاقات الحلوة.
وفاء عامر: كنت بفتش في هاتف زوجي وبطلت
وكشف وفاء عامر، عن أنها كانت تفتش في هاتف زوجها ومن ثم امتنعت عن ذلك التصرف، بعدما علمت أن الدين يحرم ذلك، قائلة: زمان كنت بفتش في موبايل جوزي، وامتنعت لما لقيت إن ديني بيقول لي لأ، لإن فيه آية بتقول: “يا أيها الذين آمنوا لا تسألوا عن أشياء إن تبدَ لكم تسؤكم”.
وأضافت وفاء عامر موجهة نصيحة للسيدات: ليه تنكشي على النكد، أنت ممكن تروحي للمأذون بسبب رسالة، ليه مثلا أقول له جارتنا وهي طالعة لما قالت لك إزيك ليه رديت بابتسامة، الراجل مش بيحب الست الزنانة.
