نيرة عارف: ابني مدخلش مجال الغناء عشان ميبقاش عايش في جلباب أبيه علي الحجار
أعرب نور علي الحجار، المخرج المساعد بفيلم الصف الأخير، ونجل الفنانة نيرة عارف، عن سعادته البالغة بالعمل مع فريق الفيلم، كما كشفت والدته أن والده هو سبب عدم دخوله مجال الغناء.
وأكدت نيرة عارف، خلال حوارها مع القاهرة 24، أن نجلها يتمتع بموهبة الغناء، بجانب عمله في الإخراج، ولكنه رفض دخول هذا المجال حتى لا يقال عنه إنه يعيش في جلباب أبيه الفنان علي الحجار، قائلة: ابني أصلا مطرب بس محبش يدخل المجال عشان ميتقالش إنه دخل بواسطة والده الفنان علي الحجار، وكمان عشان ميبقاش عايش في جلباب أبيه.
وأضافت: بس برضه لقاني في وشه في سكة التمثيل، فـ قرر يشتغل مساعد مخرج واشتغل معايا مساعد مخرج في مسلسل ولاد ناس.
فيما أعرب نور علي الحجار، خلال حواره مع القاهرة 24، عن سعادته بالعمل كمساعد مخرج في فيلم الصف الأخير، قائلا: فريق عمل فيلم الصف الأخير من أحلى الناس اللي اتعاملت معاهم ومفيش نفسيات، وكلنا كنا صحاب من قبل الفيلم، ومش أول مرة أشتغل مع ماما مساعد مخرج، وهي من أكتر الناس اللي بتقف في ضهري ومعايا دايما، وناوي أفكر في التمثيل بس دلوقتي مركز أكتر في الإخراج.
نيرة عارفة تتحدث عن مشاركتها في فيلم الصف الأخير
وسبق وكشفت نيرة عارف تفاصيل دورها في فيلم الصف الأخير، خلال حوارها مع القاهرة 24،وقالت: بعمل دور ناتيليه، وهي شخصية مش مصرية، وبيحصل مشادة بينها وبين بيومي فؤاد في القطر، لأنه كان واخد مكانها في القطر اللي كان درجة أولى.
وتابعت: هو كان حاجز درجة تانية، فـ حصل لخبطة عموما، وتيام اللي صلح بينهم، عشان قام من مكانه ليا، وترشيحي للدور جه من المخرج عشان كان شافلي حاجات، فـ قالي محتاجينك تيجي ضيفة شرف في الفيلم.
