برلماني لـ الحكومة: غرقتونا وخنقتونا إحنا واللي خلفونا واللي خلفناهم
علق النائب فريدي البياضي عضو مجلس النواب، على الحساب الختامي لموازنة الحكومة 2021- 2022، قائلا: أوجه كلامي للحكومة، وأنا أرفض التقرير وأقول، كفاية ديون، غرقتونا وخنقتونا، إحنا واللي خلفونا، واللي خلفناهم واللي هنخلفوهم.
وأضاف البياضي، خلال الجلسة العامة للبرلمان: الوزير بيقول أرقام ونسب وبيحاول يثبت إن نسبة الدين في تحسن، يا إما أرقامك وهمية يا وزير، وأنا متأكد من كدا لأن الـ 87% دول مش حاطط فيهم 24% ديون هيئات الاقتصادية، مردفًا: حاسب سعر الدولار على 18 جنيه، يا إما لو إنت صح يبقى إحنا اللي وهميين.
الحساب الختامي لموازنة الحكومة
وتابع قائلا: احنا بنتكلم على إجمالي ديون تعدت الـ 10 تريليون وتجاوزت إجمالي الناتج المحلي وفوائد ديون بتاكل نصف المصروفات، مستطردا: كفاية انتهاك للدستور، حرام عليكم انتم أقسمتم على احترامه، النسب اللي حددها الدستور للتعليم والصحة في 2014 واللي مفروض تزيد كل سنة، الحكومة مبتصرفش ربع النسب دي، الوطن لن ينصلح حاله إلا لما تعرفوا أهمية وأولوية التعليم والصحة.
وواصل البياضي كلمته قائلًا: كفاية على الحكومة، إحنا قدام حكومة لا تحكم، ولا تستطيع أن تحكم، حكومة حققت العدالة الاجتماعية بأن أفقرت كل طبقات الشعب، بلا استثناء، متابعا: من 3 سنين تحت قبة المجلس طالبت وحدي بإقالة الحكومة، واليوم مع كثير من النواب ومع جموع الشعب نصرخ، كفاية كفاية كفاية.
