شاب بالدقهلية يطلب الدعاء للعثور على أهله: بحلم بحضنهم كل يوم وبدعي ربنا يجمعني بيهم
لا يدرك نعمة الأهل إلا فاقدها، وقصة حسام بكر نافع الشاب التي يبلغ من العمر 26 عامًا، ومقيم بمدينة المنصورة في محافظة الدقهلية، برغم نجاحه في عمله واستقراره المادي، ولكن لازال يبحث عن أهله ويسلك جميع الطرق في محاولة للوصول إلى ذويه.
بحلم بحضنهم كل يوم وبدعي ربنا يجمعني بيهم
مش محتاج غير سند وأهل.. بهذه الكلمات بدأ حسام بكر نافع حديثه مع القاهرة 24، في محاولة منه للبحث عن أسرته وقال: أنا أتربيت في دار أيتام وكنت عايش حياة طبيعية داخل الدار، ولما بدأت أدخل مدرسة المدرسين كانوا بينادوا علينا بأولاد الدار، ومفهمتش الكلمة لحد ما بدأت أسأل المشرفين في الدار، وكان الرد والذي تم ثبت في الأوراق الرسمية أن شخص عثر عليه في شارع الثانوية بمدينة المنصورة، وكان عمري حوالي شهر، وعشت في دار الإيتام لحد سن الـ 16 سنة.
وأضاف حسام: أنا بعد خروجي من الدار حصلت على دبلوم تبريد وتكيف، وبشتغل الصبح وبليل عشان أقدر أكون نفسي، والحمد الله مستقر ماديًا ومش محتاج حاجة غير أهلي، وروحت للسجل المدني أحاول أوصل لأي معلومة ولكن معرفتش أوصل لحاجة، ونزلت منشور على مواقع التواصل الاجتماعي في بوك بصورتي وأنا صغير يمكن حد يشوفها ويكلمني.
وأضاف: مش محتاج حاجة في الدنيا غير أهلي ونبقي سند لبعض وونس لبعض بدعي ربنا كل يوم إن يجمعني بيهم.
